ԵՐԵՎԱՆ, 17 օգոստոսի — Sputnik, Արմենուհի Մխոյան. ՀՀ ՊՆ անելու է ամեն ինչ, որ Ադրբեջանում հայտնված հայ զինծառայող Արայիկ Ղազարյանը նախևառաջ չխոշտանգվի: Այս մասին այսօր Sputnik Արմենիայի հետ զրույցում ասաց ՀՀ ՊՆ մամուլի քարտուղար Արծրուն Հովհաննիսյանը:
«Ամեն ինչ անելու ենք, որ հնարավորություն լինի նրան վերադարձնելու: Ցավոք, այդ ամենն իրականացվում է միայն ու միայն միջազգային կազմակերպությունների միջոցով, քանի որ Ադրբեջանի հետ ուղիղ շփում չունենք: Բոլոր հնարավոր ջանքերը շարունակելու ենք դնել այս խնդրի լուծման համար»: Ըստ պատասխանատուի` այս գործողություններին զուգահեռ, այն զորամասում, որտեղ ծառայել է Արայիկը, այս պահին քննություն է անցկացվում:
«Քննությունն ընթանում է, և այն կպարզի շատ ու շատ հարցեր»,–ասաց Հովհաննիսյանը:
Միջազգային Կարմիր խաչն աշխատանքներ է տանում Ադրբեջանում հայտնված հայ զինծառայողին հանդիպելու ուղղությամբ: Այս պահին ՀՀ ՊՆ դեռ լուր չունի արդյո՞ք հանդիպումը կայացել է, թե ոչ:
Ընդհանուր առմամբ, խոսելով դեպքի մասին, Արծրուն Հովհաննիսյանը նշեց, որ տարբեր հակասական կարծիքներ կան, բայց իրենք հակված են հաստատելու Արայիկի մեծ եղբոր դիրքորոշումը: «Արայիկ Ղազարյանի եղբայրը մեզ տեղեկացրել է, որ ամենի ինչ նորմալ է եղել, ու ինքը նորմալ ծառայել է։ Վերջերս էլ իրեն բուժական օգնություն է ցուցաբերվել, ու հենց այդ հետքերն է Ադրբեջանը ներկայացնում որպես խոշտանգում, բայց դա իրականում բուժական միջամտություն է: Ինչպես արդեն ասել է ՀՀ պաշտպանության նախարարը, մենք հակված ենք այն տեսակետին, որ ինքը մոլորվել է, բայց ամեն ինչ մանրամասն կուսումնասիրենք»:
Ովքեր են Ադրբեջանում պահվող հայերն ու հայկական կողմում պատիժ կրող ադրբեջանցիները
Անդրադառնալով սահմանային իրավիճակին` Արծրուն Հովհաննիսյանը նշեց, որ ներկա պահին իրավիճակը համեմատաբար հանգիստ է: «Թեպետ 2 օր առաջ մենք վիրավոր ունեցանք, Ադրբեջանն էլ, կարծես թե, վիրավորի մասին լուր տվեց, բայց ընդհանուր առմամբ, վիճակը հանգիստ է»,-նշեց Արծրուն Հովհաննիսյանը:
Հիշեցնենք, որ Արցախի ՊԲ–ն հայտնել էր, որ օգոստոսի 12–ին ժամը 12:00-ի սահմաններում, ՊԲ հարավ-արևելյան ուղղությամբ տեղակայված զորամասերից մեկի պահպանության տեղամասից, դեռևս չպարզված հանգամանքներում, մարտական դիրքը լքել է զինծառայող, 2000թ. ծնված Արայիկ Ղազարյանը։ ՀՀ պաշտպանության նախարար Դավիթ Տոնոյանն էլ հայտնել էր, որ զինծառայողը, ամենայն հավանականությամբ, մոլորվել է։
