ԵՐԵՎԱՆ, 14 օգոստոսի — Sputnik. Իշխանությունը փորձում է շահագրգռել ՍԴ դատավորներին իրենց ժամկետի ավարտից շուտ լքել պաշտոնը։ Այսօր Sputnik Արմենիա մուլտիմեդիոն մամուլի կենտրոնում կայացած ասուլիսում, մեկնաբանելով Դատական օրենսգրքում ու Սահմանադրական դատարանի մասին օրենքում առաջարկվող փոփոխությունները, ասաց Հայկ Ալումյանը` այդ առաջարկը կապելով նաև իր պաշտպանյալի հետ։
«Եթե սա պարոն Քոչարյանի գործի հետ կապ չունենար, այլ ուղղակի ընդհանուր ինչ-որ նպատակների համար արվեր, դեռ կարելի էր քննարկել` սա լավ մոտեցում է, թե վատ։ Բայց այս դեպքում ամեն ինչից ակնհայտորեն երևում է, որ այդ օրենսդրական նախագիծն ուղղակիորեն նպատակ է հետապնդում պարոն Քոչարյանի գործի հետ կապված ՍԴ–ում ստեղծել այնպիսի իրավիճակ, որ նրա գործով ՍԴ–ն չիրականացնի արդարադատություն»,– ասաց Ալումյանը։
Փաստաբանի համոզմամբ` իշխանության նախաձեռնած «ոտնձգություններն» ուղղված են նրան, որ մինչ ՄԻԵԴ–ից և Վենետիկի հանձնաժողովից ստացվեն սպասված կարծիքներն, ու ՍԴ–ում գործի վարույթը վերսկսվի, ՍԴ–ն այլևս չունենա այն կազմը, որն ունի այսօր։
«Հիշեք Գագիկ Ջհանգիրյանի` երկու ամիս առաջվա մի հարցազրույց, որի վերաբերյալ մենք, ի դեպ, հանցագործության մասին հաղորդում ենք ներկայացրել ու պարզ չէ, թե այն ինչ ընթացքի մեջ է, երբ նա ասել էր, որ պարոն Քոչարյանի գործը ՍԴ–ն չի քննի, կամ առնվազն, եթե քննի էլ, ապա ոչ այսօրվա կազմով»,– ասաց Ալումյանը` համոզմունք հայտնելով, որ ներկայացված փաստերը վկայում են այն մասին, որ ՍԴ–ի շուրջ տեղի ունեցող օրենսդրական փոփոխությունները սերտորեն կապված են ՀՀ երկրորդ նախագահի գործի քննության հետ։
Իշխանությունը չի հասկանում երկրի առաջ ծառացած խնդիրների ողջ բարդությունը. Ռոբերտ Քոչարյան
Նախագծում կա նաև մի այսպիսի դրույթ, ըստ որի՝ այս տարվա օգոստոսի 1-ից մինչև հոկտեմբերի 31-ը հրաժարական ներկայացրած Սահմանադրական դատարանի դատավորի նկատմամբ անկախ տարիքից պահպանվում են իր հրաժարականի պահին ունեցած աշխատավարձը, դրա նկատմամբ սահմանված հավելավճարները և սոցիալական երաշխիքները, մինչև իր պաշտոնավարման տարիքը լրանալը, բացառությամբ նրա կողմից հանրային ծառայության անցնելու դեպքի։ Սահմանադրական դատարանի դատավորն իր պաշտոնավարման տարիքը լրանալուց հետո ստանում է օրենքով դատավորի համար նախատեսված կենսաթոշակ։
Հիշեցնենք` մայիսի 18-ին Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, որոշեց ՀՀ երկրորդ նախագահ Ռոբերտ Քոչարյանին անձնական երաշխավորությամբ ազատ արձակել։
Հունիսի 25–ին ՀՀ Վերաքննիչ քրեական դատարանի դատավոր Արմեն Դանիելյանը որոշում կայացրեց կրկին կալանավորել Արցախի նախկին և ներկա նախագահների անձնական երաշխավորությամբ ազատ արձակված Ռոբերտ Քոչարյանին, իսկ նրա և մյուսների վերաբերյալ գործի վարույթը կասեցնելու առաջին ատյանի դատարանի դատավոր Դավիթ Գրիգորյանի որոշումը բեկանել և գործն ուղարկել նոր քննության։
ՍԴ–ն, սակայն, իր հերթին որոշում էր կայացրել գործի քննությունը կասեցնել ու ուղարկել Մարդու իրավունքների եվրոպական դատարան և Վենետիկի հանձնաժողով` խորհրդատվական կարծիքներ ստանալու։
