ԵՐԵՎԱՆ, 24 հունիսի — Sputnik, Արմենուհի Մխոյան. Արդեն մի քանի օր է, ինչ հայկական արժեքների պաշտպանության «Կամք» հասարակական նախաձեռնությունը Ստամբուլյան կոնվենցիայի վավերացման դեմ ստորագրահավաք է իրականացնում նաև Շիրակի մարզկենտրոն Գյումրիում՝ Ռիժկովի ճեմափողոցում:
Նախաձեռնության համակարգող խորհրդի անդամ Արթուր Արամյանը Sputnik Արմենիայի հետ զրույցում նշեց, որ Գյումրիում բնակիչներն ակտիվ մասնակցում են ստորագրահավաքին, թեև շատ են նաև նրանք, ովքեր տեղյակ չեն կոնվենցիայի մասին: «Մենք նաև իրազեկում ենք: Շատերը տեղյակ չեն կոնվենցիայի մասին»,-ասաց Արթուր Արամյանը:
Ստամբուլյան կոնվենցիայի և փաստաթղթի վավերացման դեպքում, ըստ «Կամք»-ի ներկայացուցիչների՝ տրամաբանական շարունակության մասին նրանք տեղեկացնում էին գյումրեցիներին: Ընթացքում գյումրեցիների մեծ մասն անմիջապես համաձայնում էր ստորգարել ընդդեմ այդ կոնվենցիայի վավերացման: Ստորագրահավաքին միացած քաղաքացիների կոնկրետ թիվ նախաձեռնող խբի անդամններն այս պահին չցանկացան հրապարակել, բայց վստահեցրին, որ մոտ 3 ժամվա ընթացքում ավելի քան 300 քաղաքացի է ստորագրել կոնվենցիան չվավերացնելու պահանջի տակ:
Ստորագրահավաքին միացավ նաև 65-ամյա տիկին Ռոզան: Նա նաև կոչ արեց գյումրեցիներին միանալ այդ գործին: Բացատրելով իր արձագանքը, տիկինը նկատեց. «Աղջիկ ջա՛ն, այդպիսի բան ո՞վ է տեսել, էն էլ Հայաստանում: Ինչպե՞ս թե՝ տղամարդը տղամարդու հետ կամ կինը՝ կնոջ հետ ամուսնանա, մի հատ էլ հետո երեխա որդեգրեն: Դա խուժանություն է: Ես կոչ եմ անում խելքի գալ»:
Մեկ այլ գյումրեցի՝ Արթուր Մկրտչյանը փոքր-ինչ այլ կերպ ներկայացրե իր կարծիքը. «Նմանատիպ կոնվենցիայի վավերացումը խաթարելու է ազգային ընտանիքի, հասարակության կայունությունը, և ընդհանրապես հարիր չէ հայ հասարակությանը, դեմ է հայի մենթալիտետին և արժեհամակարգին, սա դրսի ուժերի կողմից երկրի քայքայմանն ու թուլացմանն ուղղված գործընթաց է: ՀՀ-ում, այսպես թե այնպես, կա ընտանեկան բռնության նկատմամբ բավական լուրջ օրենսդրական վերաբերմունք, կան սահմանված պատիժներ, կան սահմանադրություն կետեր: Այնպես որ, կոնվենցիայի կարիքը չկա, ավելի շատ դա սեռական քարոզ է»:
Ըստ ստորագրահավաքի նախաձեռնողների, Ստամբուլյան կոնվեցիայի հիմքում ընտանիքում ու կանանց նկատմամբ բռնության դեմ պայքարի վերնագրով իրականում քողարկված է նպատակաուղղված քարոզ նույնասեռական զույգերի լեգիտիմացմանը, գենդերային հիմքով բռնության, գենդերային խտրականության դրսևորման և այլնի: «Պաշտոնատարները ասում են, որ կոնվենցիայում նման բաներ գրված չեն»,-նկատում է Արթուր Արամյանը, հավելելով, որ իրենք էլ իրենց հերթին վերլուծում են խնդրո առարկա փաստաթղթի բովանդակությունը, պահանջները, նշելով, որ դրանց տրամաբանական շարունակությունը հենց ազգային արժեքները վտանգող երևույթների ամրագրումն է: Նա կարծում է նաև, որ այդ կոնվենցիան իրականում սպառնում է հատկապես փոքրաթիվ ազգերին՝ ինչպես ժողովրդավարական, այնպես էլ ազգային ավանդույթների պահպանման առումով:
Նախաձեռնողները նշում են, որ պատրաստվում են այցելել հանրապետության այլ մարզեր ևս:
