Երևանի պետական համալսարանի սահմանադրական իրավունքի ամբիոնի վարիչ Վարդան Այվազյանը Sputnik Արմենիայի հետ զրույցում «ոտքից գլուխ անհեթեթություն» է որակել Արդարադատության նախարարության կողմից քննարկման ներկայացված՝ Դատական օրենսգրքում և հարակից օրենքներում փոփոխություններ և լրացումներ կատարելու մասին օրինագիծը։
Այս փոփոխություններով պետությունը գործարք է առաջարկում դատավորներին. այն ՍԴ դատավորները, որոնք օգոստոսի 1-ից մինչև հոկտեմբերի 31-ը հրաժարական ներկայացնեն՝ անկախ տարիքից կպահպանվեն իր հրաժարականի պահին ունեցած աշխատավարձը, դրա նկատմամբ սահմանված հավելավճարները և սոցիալական երաշխիքները, մինչև իր պաշտոնավարման տարիքը լրանալը։
Սահմանադրագետ Վարդան Այվազյանն այս օրինագիծը անհեթեթություն է անվանում և նշում, որ եթե պետական պաշտոնյաները վերևից ներքև գաղափար չունեն՝ իրավունքն ինչ բան է, ինչ է թույլատրվում, ինչը` ոչ, բնականաբար, իրենք իրենց ամենաթողության են տվել, իրենց թվում է՝ ինչ ուզենան՝ կարող են անել։ Կա իրականություն և կա ճշմարտություն. իրականությունն այն է, որ ինչ օրենք ուզում՝ անում են, ինչ օրենք ուզում՝ ընդունում են, տրամաբանություն չկա, և որը ճշմարտության հետ որևէ աղերս չունի։
«Սուբեկտիվ, անգրագետ էքսպերիմենտների առարկա են դարձնում պետությունը։ Սա է խնդիրը»,-ասել է Այվազյանը։
Սահմանադրագետը չի բացառում, որ նույն հաջողությամբ վաղը կարող են օրենք ընդունել, որ բոլորը պետք է մերկ ման գան, օրենք ընդունեն և թույլատրեն նույնասեռականների ամուսնությունները, հետո էլ դպրոցներում, բուհերում պարտադրեն քարոզը։
Հիշեցնենք, որ Արդարադադտության նախարարությունը հանրային քննարկման է ներկայացրել Դատական օրենսգրքում, ինչպես նաև Սահմանադրական դատարանի մասին օրենքում և հարակից օրենքներում փոփոխություններ և լրացումներ կատարելու մասին օրինագիծը։
Նախագծով դատավոր դառնալու համար տարիքային ցենզը 28-ից իջեցվել է 25-ի, իսկ 5 տարվա մասնագիտական աշխատանքի փորձառության փոխարեն նախատեսվում է սահմանել 3 տարին։
Բոզոյան․ «ՍԴ-ն վերջին բաստիոնն է, որ փորձում է գրավել Նիկոլ Փաշինյանը»
Նախագծում կա նաև մի այսպիսի դրույթ, ըստ որի՝ այս տարվա օգոստոսի 1-ից մինչև հոկտեմբերի 31-ը հրաժարական ներկայացրած Սահմանադրական դատարանի դատավորի նկատմամբ անկախ տարիքից պահպանվում են իր հրաժարականի պահին ունեցած աշխատավարձը, դրա նկատմամբ սահմանված հավելավճարները և սոցիալական երաշխիքները, մինչև իր պաշտոնավարման տարիքը լրանալը, բացառությամբ նրա կողմից հանրային ծառայության անցնելու դեպքի։ Սահմանադրական դատարանի դատավորն իր պաշտոնավարման տարիքը լրանալուց հետո ստանում է օրենքով դատավորի համար նախատեսված կենսաթոշակ։
