ԵՐԵՎԱՆ, 9 օգոստոսի — Sputnik. Երևանի քաղաքապետ Հայկ Մարությանն այսօր չի մասնակցում Երևանի ավագանու արտահերթ նիստին, որի ընթացքում քննարկվում է «Երևանի Աղբահանություն և սանիտարական մաքրում» համայնքային հիմնարկի համար նոր տեխնիկա ձեռք բերելու հարցը։
Նիստը վարում է Մարությանի տեղակալ Հրաչյա Սարգսյանը։ Ավագանու «Լույս» խմբակցության ղեկավար Դավիթ Խաժակյանը նիստի սկզբում հետաքրքրվեց, թե ինչու է քաղաքապետը բացակայում։
«Մի փոքր վատառողջ է, այդ պատճառով չի եկել», – նշեց Սարգսյանը։
Նշենք, որ քաղաքապետարանը նախատեսում է գնել 5 փոշեկուլ ավտոմեքենա, որոնք կմաքրեն մայթերն ու գազոնները, 11 ձնամաքրող մեծ մեքենա, 10 փոքր ձնամաքրող մեքենա, որոնք կմտնեն բակեր, 22 ձնամաքրող տրակտոր՝ մայթերի մաքրման համար, 10 փոքր աղբահավաք մեքենա, 3 միավոր աղբաման լվացող մեքենա, որ աղբամանները քլորաջրով լվացվեն, ախտահանվեն և 1000 մետաղական աղբարկղ:
Հիշեցնենք` Երևանում աղբահանության խնդիրը սրվեց անցած տարվա ամռանը։ Աղբահանությամբ զբաղվող «Սանիթեք» ընկերությունը մի քանի անգամ տուգանվեց, բայց հարցն այդպես էլ չլուծվեց։
Բողոքի ակցիա Երևանի քաղաքապետարանի դիմաց. ոստիկանությունը 3 քաղաքացու է բերման ենթարկել
Ապրիլի 18–ի կառավարության նիստում վարչապետ Նիկոլ Փաշինյանը քաղաքապետ Հայկ Մարությանից բացատրություն պահանջեց աղբահանության վիճակի համար։ Վերջինս, ներկայացնելով իրավիճակը, խնդրեց թույլ տալ կազմակերպել աղբատարների գնման լրացուցիչ գործընթաց։
Հուլիսի սկզբին հայտնի դարձավ, որ ընկերությունը դատի է տվել Երևանի քաղաքապետարանին` պահանջելով վերադարձնել որպես տուգանք վճարած գումարը։
«Սանիթեքը» մտադիր է միջազգային արբիտրաժային դատարան դիմել, եթե քաղաքապետարանը չհամաձայնվի ճգնաժամի կարգավորման իր պայմաններին։
