ՀՀ վարչապետ Նիկոլ Փաշինյանը Facebook-ի իր էջում տեսանյութ է հրապարակել, որտեղ ԵԱՏՄ միջկառավարական նիստից հետո հրավիրած ճաշկերույթի ժամանակ ղրղըզ երգչուհին կատարում է Սիլվա Հակոբյանի «Ես չեմ ուզում քեզ մոռանալ» երգը։ Ճաշկերույթին մասնակցում են ԵԱՏՄ միջկառավարական խորհրդի նիստի բոլոր մասնակիցները, այդ թվում` Ղրղզըստանի նախագահ Սոորոնբայ Ժեենբեկովը և ՌԴ կառավարության նախագահ Դմիտրի Մեդվեդևը։
Հիշեցնենք, որ ՀՀ վարչապետ Նիկոլ Փաշինյանն աշխատանքային այցով գտնվում է Ղրղզստանի Հանրապետությունում՝ Եվրասիական միջկառավարական խորհրդի նիստին մասնակցելու նպատակով, որը գլխավորում է որպես նախագահող երկրի ղեկավար։
Նիստը տեղի է ունեցել այսօր, որի ժամանակ կազմակերպության մասնակից երկրների կառավարության ղեկավարները քննարկել են ԵԱՏՄ շրջանակում ալկոհոլային շուկայի կարգավորման համաձայնագրերի վրա տարվող աշխատանքները, ինչպես նաև միության շրջանակում փոխադարձ առևտրի ընդլայնման համար պայմաններ ստեղծելու հարցը։ Մասնավորապես, խոսքը համատեղ կանխատեսումների, ագրոարդյունաբերական համալիրի զարգացման, գյուղմթերքի գծով միության անդամ երկրների պահանջարկի և առաջարկի հավասարակշռության հրապարակման մասին է։ Դա գյուղմթերքի արտադրողներին կօգնի ավելի լավ կողմնորոշվել սեփական ռազմավարությունը մշակելիս։
ՀՀ վարչապետը հայտարարել է Եվրասիական միջկառավարական խորհրդի հաջորդ նիստի անցկացման օրն ու վայրը։ Այն կանցկացվի 2019 թվականի հոկտեմբերի 25-ին Մոսկվայում։
