ԵՐԵՎԱՆ, 7 օգոստոսի — Sputnik. Մարդու իրավունքների եվրոպական դատարանը Սահմանադրական դատարանին տեղեկացրել է, որ ՀՀ երկրորդ նախագահ Ռոբերտ Քոչարյանի գործով ներկայացված դիմումն առաջնահերթության կարգով կքննարկվի։ Այս մասին հայտնում է Սահմանադրական դատարանը։
«Մարդու իրավունքների եվրոպական դատարանը հաստատել է դիմումը ստանալու հանգամանքը, ինչպես նաև տեղեկացրել դիմումի՝ առաջնահերթության կարգով քննարկման ենթակա լինելու մասին»,– նշված է ՍԴ–ի հայտարարության մեջ։
Հիշեցնենք, որ մայիսի 18-ին Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, որոշեց ՀՀ երկրորդ նախագահ Ռոբերտ Քոչարյանին անձնական երաշխավորությամբ ազատ արձակել։
Հունիսի 25–ին Վերաքննիչ քրեական դատարանի դատավոր Արմեն Դանիելյանը որոշում կայացրեց կրկին կալանավորել Արցախի նախկին և ներկա նախագահների անձնական երաշխավորությամբ ազատ արձակված Ռոբերտ Քոչարյանին, իսկ նրա և մյուսների վերաբերյալ գործի վարույթը կասեցնելու առաջին ատյանի դատարանի դատավոր Դավիթ Գրիգորյանի որոշումը բեկանել և գործն ուղարկել նոր քննության։
ՍԴ–ն, սակայն, իր հերթին որոշում էր կայացրել գործի քննությունը կասեցնել ու ուղարկել Մարդու իրավունքների եվրոպական դատարան և Վենետիկի հանձնաժողով` խորհրդատվական կարծիքներ ստանալու։
Ռոբերտ Քոչարյանի գործում պատային վիճակ է. պաշտպանները վստահեցնում են` որևէ զարգացում չկա
