Ճիշտ քաղաքականության դեպքում վարչապետ Նիկոլ Փաշինյանի` Հայաստանի երկարաժամկետ զարգացման հայեցակարգը հնարավոր է իրագործել։ Այդ մասին Sputnik Արմենիայի հետ զրույցում ասաց տնտեսագետ Վահագն Խաչատրյանը։
«Մինչև 2050 թվականը 5 միլիոն բնակչության համար 1.5 մլն աշխատատեղ ունենալը նորմալ երևույթ է։ Դա ռազմավարություն է, որին պետք է ձգտել և հասնել։ Այն տարբերվում է կառավարության հրապարակած կարճաժամկետ ծրագրերից, որոնք պարտադիր են»,- նշեց նա։
Ըստ նրա` այդ թվերը տնտեսագիտորեն հիմնավորված չեն. դրանց իրատեսական լինելու մոտեցումն էլ միանշանակ չի կարող ընդունվել։
«Ինձ համար ավելի կարևոր է այն փիլիսոփայությունը, որով կառաջնորդվի նոր կառավարությունը։ Ներկայացված թվերն արդեն իսկ պատասխանատվություն են ենթադրում և քննադատության առիթ են դարձել, մանավանդ, որ վարչապետը նշել է` ծրագիրը դեռևս քննարկման կարիք ունի»,–ասաց Խաչատրյանը։
Փաշինյանը մի քիչ ճոխացրել է Սերժ Սարգսյանի խոստումները. Բադալյանը` վարչապետի ելույթի մասին
Տնտեսագետի խոսքով` ցանկացած ռազմավարական ծրագիր ունի մեկ խնդիր` արդյո՞ք այն կդառնա հաջորդ կառավարության ծրագիրը և որքանո՞վ կապահովվի այդ հաջորդականությունը։
