ԵՐԵՎԱՆ, 5 օգոստոսի — Sputnik. Կոտայքի լեռներում թաքնված Ակնալիճը բացահայտելու առաջին անհաջող փորձից հետո` 1 ամիս անց Sputnik Արմենիայի նկարահանող խումբը դարձյալ Գեղամա լեռներում է։
Մինչ կհասնենք գեղատեսիլ Ակնալիճ, Գեղամա լեռների Ակնասարը մեր նկարահանող խմբի համար անակնկալ էր պատրաստել։
Ծովի մակարդակից շուրջ 3000 մետր բարձրության վրա` ալպիական լեռներում Sputnik Արմենիայի տեսախցիկն արձանագրեց հայկական բնաշխարհի անկրկնելի բնանկարներից մեկը, որի համար թերևս արժեր երկրորդ անգամ մագլցել լեռներն ու հաղթահարել ձյունապատ տարածքը։
500 հազար քառ. մետր մակերեսով, 15 մետր խորությամբ, ալպիական մարգագետիններով ու հրաբխային կոներով շրջապատված քաղցրահամ լիճը 2008թ. ներառվել է բնության հուշարձանների ցանկում։
Դադիվանք. ինչպես ադրբեջանաբնակ քուրդը «փրկեց» Արցախի վանքի որմնանկարները
Ուսումնասիրությունները ցույց են տվել, որ լճի հատակին մի քանի մանր աղբյուրներ կան։ Ափերը զավթած գորտերից բացի` լճի խորքերում, տարիներ առաջ ֆրանսիացի սուզակները նաև մանր գունավոր ձկներ են հայտնաբերել, բայց Ակնալճի կենդանական աշխարհն այսօր էլ մանրամասն ուսումնասիրված չէ։
