Խոսքի ազատության պաշտպանության կոմիտեի նախագահ Աշոտ Մելիքյանն ահազանգում է, որ Հատուկ քննչական ծառայությունը կրկին կասեցրել է «Էլեկտրիկ Երևանի» իրադարձությունների առնչությամբ հարուցված քրեական գործը։ Մելիքյանն այդ մասին տեղեկացել է իրենց փաստաբանից, որը ստացել է ՀՔԾ-ի որոշումը։
«Կարծում եմ, որ ՀՔԾ-ն ի սկզբանե ձևական մոտեցում է ցուցաբերել «Էլեկտրիկ Երևանի» գործին։ Նույն կարծիքին են լրատվամիջոցների այն ներկայացուցիչները, որոնք այդ գործով տուժող են ճանաչվել»,- Sputnik Արմենիայի եթերում ասում է Մելիքյանը։
Խոսքի ազատության պաշտպանության կոմիտեի նախագահի խոսքով` ՀՔԾ-ն այսօր դարձյալ շարունակում է նույն մոտեցումը։ Նախկինում Հատուկ քննչական ծառայությունը «Էլեկտրիկ Երևանի» գործը կասեցրել էր՝ պատճառաբանելով, որ որպես մեղադրյալ ներգրավման ենթակա անձինք հայտնի չեն։ 2019 թվականի մայիսին ՀՀ գլխավոր դատախազությունն «Էլեկտրիկ Երևանի» գործը վերադարձրել է Հատուկ քննչական ծառայություն՝ նախաքննությունը շարունակելու համար:
«Տպավորություն է, որ «Էլեկտրիկ Երևանի» գործով իրավապահները «պինգ-պոնգ» են խաղում»,-ասում է Մելիքյանը։
Նրա խոսքով` ամեն ինչ շատ ավելի լուրջ է, քանի որ 20-ից ավելի լրագրողներ ու օպերատորներ են տուժել 2015 թվականին էլեկտրաէներգիայի սակագնի բարձրացման դեմ իրականացված բողոքի ակցիաների ժամանակ:
«Որքան էլ ժամանակ անցնի, միևնույն է՝ մեղավորները պետք է պատասխանատվության ենթարկվեն»,-պնդում է Մելիքյանը։
Լրագրողական կազմակերպության ղեկավարի կարծիքով` ՀՔԾ-ն առանց ոստիկանության օժանդակության չի կարող բացահայտել այդ գործը։
«Բայց, քանի որ լրագրողների նկատմամբ բռնություն գործադրածները հիմնականում ոստիկաններն են եղել, այդ է պատճառը, որ հիմա իրավապահները չեն ցանկանում իրենց գործընկերներին հանձնել արդարադատությանը»,- ասում է «Խոսքի ազատության պաշտպանության կոմիտեի» նախագահը։
Մելիքյանը վստահեցնում է` թույլ չեն տալու, որ մոռացվի «Էլեկտրիկ Երևանի» գործը և կրկին բողոքարկելու են ՀՔԾ-ի որոշումը։
Շտապօգնության աշխատակիցներն էլ ներառվեցին, մնացին լրագրողները
