ԵՐԵՎԱՆ, 1 օգոստոսի — Sputnik, Լաուրա Սարգսյան. Հայկական ֆաունան համալրվել է Եվրոպայից բերված չորս վագրով։ Sputnik Արմենիայի թղթակցի հետ զրույցում այս մասին ասաց «Զու Ֆաունա Արտ» ընկերության սեփականատեր Արթուր Խաչատրյանը, որն էլ հենց բերել է գիշատիչներին։
«Երեք սպիտակ ու մեկ ամուրյան վագրիկներին բերել ենք բուծելու նպատակով։ Նրանք արդեն չորս ամիս է` Հայաստանում են», – ասաց Խաչատրյանը` չհստակեցնելով, թե որտեղ են ապրում կենդանիները։ Հարցին` ինչու վագրերը Երևանի կենդանաբանական այգում չեն, Խաչատրյանը հեգնանքով պատասխանեց. «Մեր կենդանաբանական երևի միայն ոջիլը կարող է ողջ մնալ»։
Խաչատրյանը վստահեցրեց, որ վագրի ձագերը Հայաստանում են ապրելու, և այժմ նրանց համար հիանալի պայմաններ են ստեղծվել, կենդանիներն ապահով ձեռքերում են, նրանց վանդակներն էլ համապատասխանում են եվրոպական բոլոր նորմերին։
Սպիտակ վագրերն արդեն մեկ տարեկն յոթ ամսական են, իսկ ամուրյանը` ընդամենը 7–8 ամսական։
«Սպիտակ վագրերը Եվրոպայում են ծնվել, երկուսը որձ են, մեկը` էգ։ Նրանք երեքով են ապրում», – ասաց Խաչատրյանը։
Ինչ վերաբերում է հայտարարություններին ու հրապարակումներին, թե կենդանիների այդ տեսակը չի կարող գոյատևել Հայաստանում, Խաչատրյանը հակառակն է պնդում։ Նրա խոսքով` Հայաստանի կլիմայական պայմանները հարմար են բոլոր տեսակի կենդանիների համար։ Ավելին` Հայաստանը Նիդեռլանդների, Բելգիայի ու Գերմանիայի պես կատարյալ երկիր է էկզոտիկ բուծարանների համար։
«Հա՛, ես պահում եմ ու նորմալ եմ պահում». Երևանի փողոցներում առյուծ է զբոսնում. լուսանկար
Խաչատրյանի խոսքով` կենդանիներին օրինական ճանապարհով են բերել։ Նրանց վայրի ֆլորայի և ֆաունայի անհետացող տեսակների միջազգային առևտրի մասին կոնվենցիայի CITES ներկրման սերտիֆիկատ են տվել։
Նշենք` Երևանի կենդանաբանական այգու վագրերից մեկն այս տարվա ապրիլին սատկել էր։
Այժմ կենդանաբանական այգում երկու վագր կա, որոնցից մեկը բերվել է ԱԺ նախկին պատգամավոր Մանվել Գրիգորյանի առանձնատան տարածքից։
Ի՞նչ է անում էգ առյուծը, երբ արուն որոշում է կծել նրա հետույքը. տեսանյութ
