ԵՐԵՎԱՆ, 1 օգոստոսի — Sputnik. ՀՀ իշխանությունները որոշում են կայացրել միանալ Եվրասիական տնտեսական միության մաքսային տարածքով վտանգավոր թափոնների անդրսահմանային տեղափոխման մասին ԵԱՏՄ համաձայնագրին։
Համաձայնագիրը կրկնում է վտանգավոր թափոնների կառավարման մասին Բազելյան կոնվենցիայի հիմնական դրույթները։
Փաստաթղթի համաձայն` անդամ պետություններում չի թույլատրվում թափոնների անդրսահմանային տեղափոխումը դրանց թաղման և (կամ) վնասազերծման նպատակով։
Նշենք, որ վերոնշյալը չի վերաբերում ռադիոակտիվ թափոններին և չի արգելում աշխատած միջուկային վառելիքի և վառելիքային թափոնների տեղափոխումը Հայկական ԱԷԿ–ից Ռուսաստան։ Սահմանափակումը վերաբերում է բացառապես քիմիական և արդյունաբերական թափոններին։
Քանի որ Հայաստանը Բազելյան կոնվենցիան վավերացրել էր դեռևս 90-ականների վերջին, ապա Հայաստանի համար կանոնները չեն փոփոխվում` մեր երկիրը պարզապես վերահաստատում է դրանք Եվրասիական միության շրջանակում։
