Գեորգի Ավետիսյանի խոսքով` արդեն կան ներդրողներ, որոնք ցանկություն են հայտնել սպանդանոցներ կառուցել այն մարզերում, որոնցում դրանք բացակայում են։
«Այս պահին, թե՛ Գեղարքունիքի, թե՛ Շիրակի մարզերում սպանդանոցներ են կառուցվում, որոնք, ըստ նախնական պայմանավորվածության պետք է փակեն ամբողջ պահանջարկը»,-նշում է սննդի անվտանգության տեսչական մարմնի ղեկավարը։
Ավետիսյանի խոսքով` ներդրողները պատրաստ են շինարարություն սկսել այն դեպքում, եթե համոզված լինեն, որ մսի սպանդանոցային պահանջը պարտադիր է լինելու։
«Համոզված եմ, որ մինչև հունվար կունենանք նոր ներդնողներ ու նոր սպանդանոցներ, այսինքն` մինչև սահմանված ժամկետները հարցն ամբողջությամբ լուծած կլինենք։ Իսկ սպանդանոցային ծագում չունեցող մսեղիքը կառգրավվի»,-ասում է Ավետիսյանը։
Օգոստոսի 1-ից հանրային սննդի կետերի, իսկ 2020 թվականի հունվարի 15-ից սննդի շղթայի բոլոր օպերատորների համար թարմ մսի սպանդանոցային ծագման պահանջը կլինի պարտադիր: Ի դեպ, Սննդի անվտանգության տեսչական մարմնի ղեկավար Գեորգի Ավետիսյանը պարզաբանում է, որ սպանդանոցային մորթի պահանջը չի գործելու ծեսերի ժամանակ (մատաղ և այլն)։
