ԵՐԵՎԱՆ, 31 հուլիսի – Sputnik. Սյունիքի մարզի «Սատանի կամուրջ» կոչվող հատվածում ձորն ընկած 16 տարեկան տղայի կյանքին այլևս վտանգ չի սպառնում: Այս մասին հայտնել է «Սուրբ Աստվածամայր» բժշկական կենտրոնի մամուլի քարտուղար Գեւորգ Դերձյանը իր Facebook-յան էջում:
«Լավ լուր։ Հուլիսի 27-ին Սյունիքի մարզի Տաթև գյուղում «Սատանի կամրջից» ձորն ընկած (մոտ 20 մ.) 16-ամյա քաղաքացու մոտ դրական տեղաշարժ կա, վիճակը բարելավվում է: Նա «Սուրբ Աստվածամայր» ԲԿ էր տեղափոխվել սանավիացիայի ուղղաթիռով: Այսօր արդեն վերակենդանացման բաժանմունքից տեղափոխվել է նյարդավիրաբուժական բաժանմունք, կյանքին վտանգ չի սպառնում»,-գրել է Դերձյանը:
Հիշեցնենք, որ հուլիսի 27-ին «911» ծառայությունն ահազանգ էր ստացել, որ, ժամը 12:40-ին Սյունիքի մարզում գտնվող «Սատանի կամուրջ» կոչվող հատվածից էքսկուրսիա գնացած 16–ամյա մի քաղաքացի է ընկել ձորը։
Տղան նախ հոսպիտալացվել էր Գորիսի բժշկական կենտրոն, այնուհետև ուղղաթիռով տեղափոխվել Երևան:
Նրա մոտ հայտնաբերվել էր զուգակցված վնասվածքներ, բաց գանգուղեղային վնասվածք, կոնքի կոտրվածք։
