ԵՐԵՎԱՆ, 31 հուլիսի — Sputnik. Մեծամորի ԱԷԿ–ի անձնակազմը բարձր գնահատական է ստացել ԱԷԿ օպերատորների համաշխարհային ասոցիացիայի (WANO) կողմից։ Այս մասին Sputnik Արմենիայի թղթակցին հայտնեց «Հայատոմ» ԳՀԻ–ի տնօրեն Վահրամ Պետրոսյանը։
WANO ասոցիացիան ներառում է մոտ 130 կազմակերպություն, որոնք ամբողջ աշխարհով մեկ 430 միջուկային ռեակտոր են շահագործում։
Հունիսի վերջին արտասահմանյան մասնագետները Հայաստան էին այցելել` հերթական մոնիթորինգային առաքելությունն իրականացնելու համար։ Առաջիկայում նրանք կհրապարակեն իրենց հաշվետվությունը։ Ատոմակայանը գերազանցին մոտ գնահատական է ստացել։
Ատոմակայանների մասնագետներն ամբողջ աշխարհից մշտապես ստուգում են միմյանց կայանները, գնահատում են արդյո՞ք շահագործումը, անձնակազմի պատրաստումը ճիշտ է իրականացվում, պահպանվում է արդյո՞ք անվտանգության մակարդակը։ Գործընկերների ստուգումներին մասնակցում են նաև Հայկական ատոմակայանի մասնագետները։
Բովանդակությամբ այդ առաքելությունները նման են ԱՏԷՄԻԳ առաքելություններին, որտեղ Հայաստանի ԱԷԿ–ը նույնպես դրական եզրակացություններ է ստացել։ Տարբերությունն այն է, որ ԱՏԷՄԻԳ–ը տարբեր ուղղություններով է առաքելություններ իրականացնում, իսկ WANO–ն առաջին հերթին ուսումնասիրում է անձնակազմի գործողությունները։
Հայաստանի ատոմակայանը գտնվում է Մեծամորում, Երևանից 28 կմ հեռավորության վրա։ 2014 թվականի մարտին Հայաստանի կառավարությունը որոշեց մինչև 2026 թվականը երկարացնել հայկական ԱԷԿ-ի շահագործման ժամկետը` նոր միջուկային էներգաբլոկի կառուցման ձգձգման պատճառով։ ՀԱԷԿ-ի շահագործման ժամկետի երկարացումը կիրականացվի 270 մլն դոլարի ռուսական պետական արտահանման վարկի և 30 մլն դոլարի դրամաշնորհի հաշվին։ Մեծամոր քաղաքի մոտ գործող ատոմային էլեկտրակայանը միակն է տարածաշրջանում։
