ԵՐԵՎԱՆ, 29 հուլիսի — Sputnik. Սահմանային սրացումն Ադրբեջանը կիրառում է Ղարաբաղյան հակամարտության բանակցությունների շրջանակում հայկական կողմի վրա ճնշում գործադրելու համար։ Sputnik Արմենիայի հետ զրույցում նման կարծիք հայտնեց ռազմական փորձագետ Դավիթ Հարությունովը` մեկնաբանելով իրավիճակն առաջնագծում։
Հիշեցնենք, որ հուլիսի 27-ին և 28-ին, Հայաստանի պետական սահմանի հյուսիս–արևելյան հատվածում հակառակորդի կրակոցներից սպանվել էր ՀՀ ԶՈւ զինծառայող Արման Բուլգադարյանը, ևս երկու զինվորական վնասվածքներ են ստացել։ ՀՀ պաշտպանության փոխնախարար Գաբրիել Բալայանի խոսքով`սրացումը պայմանավորված է ակտիվ ինժեներական աշխատանքներով։
Հարությունովը կարծում է, որ, ամենայն հավանականությամբ, սրացման մի քանի պատճառ կա։ Պաշտպանության փոխնախարարի նշված ինժեներական աշխատանքները հավանական պատճառներից մեկն է։
«Ակտիվությունը, Հայաստանի և Արցախի սահմանին պարբերաբար առաջացող սրացումները նոր երևույթ չեն։ Դրանք «ինտեգրված են» բանակցությունների գործընթացին», – ասաց Հարությունովը։
Ադրբեջանական կողմը, նրա խոսքով, ժամանակ առ ժամանակ նման քայլերի է դիմում` ճնշում գործադրելու համար։ Ակտիվության նման դեպքեր եղել են նաև նախկինում։
Հարությունովը չի բացառում, որ խոսքը երկու վերոնշյալ գործոնների համատեղության մասին է։
«Դրանք միմյանց չեն խանգարում», – նշում է փորձագետը։
Ըստ նրա` դժվար է ասել, թե որքան կարող է շարունակվել այս իրավիճակը։ Մինչ 2018 թվականի բանակցային գործընթացը ցույց է տվել, որ սրացումը կարող է բավականին խորը գնալ։
Չնայած, վերջին շրջանում այն հիմնականում լոկալ բնույթ է կրում։
«Ադրբեջանական կողմը նաև չի ցանկանում շատ սրել իրավիճակը, որպեսզի այն վերահսկողությունից դուրս չգա։ Այլապես ինքը կընկալվի որպես կողմ, որը խաթարում է բանակցային գործընթացը», – ընդգծեց Հարությունովը։
Երբ երազանքներն իրականանում են. զինհաշմանդամ Տիգրան Սարգսյանի բանաձևը
Չնայած որ վերջին տարվա ընթացքում կրակոցները քիչ են եղել, դժվար է որևէ բան կանխատեսել։
Նշենք, որ Ադրբեջանի սադրիչ գործողությունների քննադատությամբ ավելի վաղ հանդես էր եկել ՀՀ ԱԳՆ–ն։
