ԵՐԵՎԱՆ, 30 հուլիսի – Sputnik. Արմատներով հայ, ռոուսական շոու բիզնեսի ներկայացուցիչներից մեկը՝ Ալեքսանդր Չումակովը, Instagram-ի իր էջում հրապարակել է վերջերս Ադրբեջանի մայրաքաղաք Բաքվում տեղի ունեցած համերգից հատված: Երգիչն այդ համերգին նույնպես ելույթ է ունեցել. հրապարակման մեջ տեղ է գտել նաև այն հատվածը, որտեղ ինքը և Լյուբա Ուսպենսկայան միասին դուետ են կատարում:
Օգտատեր nairakimi-ն, ըստ երևույթին, չի կարողացել անտարբեր անցնել Չումակովի այս գրառման կողքով և մեկնաբանություն է թողել` շեշտելով երգչի հայկական արմատների մասին: Նա ամոթանք է տվել երգչին, որ ադրբեջանցիները կրակոցներ են արձակում Արցախի սահմանին, մինչդեռ նա երգում է հակառակորդի համար:
«Ամեն բան նորմալ կհամարեի, եթե հենց երեկ Արցախում՝ Ալեքսեյ Չումակովի մոր բնակավայրում, ադրեջանական փամփուշտը չսպաներ հերթական հայ զինվորին՝ 20-ամյա Արման Բուլղադարյանին: Ու մի բան էլ, Լյուբա Ուսպենսկայան իր կարիերան սկսելու հնարավորությունների համար պետք է պարտական լինի հայկական հողին… Սակայն ինչեր չես զոհաբերի հայտնի լինելու համար, և խիղճն այստեղ բացառություն չէ», - գրել է օգտատերը:
Այս մեկնաբանությանն ի պատասխան երգիչը մի հսկայական մեկնաբանություն է թողել:
«Ես երգում եմ տարբեր ազգությունների, կրոնների, փիլիսոփայության և օրիենտացիայի մարդկանց համար: Ես երգահան եմ, որը հարգում է իր ունկնդրին և ոչ թե նրան սև և սպիտակ գունավորումներ տալիս: Կյանքը լի է տարբեր երանգներով ու դետալներով: Այդպես է եղել Աստծո կամքը: Իսկ իմ համեստ առաքելությունն է տարածել սիրո մասին իմ պատկերացումները և մարդկանց դրական էմոցիաներ փոխանցել: Իմ մոտ դա ստացվում է», - գրել է Չումակովը:
Երգչի խոսքով` իր համար էական չէ, թե մարդը որտեղ է գտնվում, ինչ ռասսայի է պատկանում կամ ինչ կրոն է դավանում, ինքը կարևորում է, որ բոլորը երջանիկ լինեն: Նա ասում է, որ դեմ է ատելության քարոզչությանը:
«Եթե ձեր կարծիքով դուք խաղաղություն սերմանեցիք, ապա չարաչար սխալվում եք: Դեռևս ագրեսիան խաղաղություն չի ծնել, իսկ ձեր անտեղի գրությունը չի ծնի ազնվություն: Ես ձեզ խորհուրդ եմ տալիս առաջին հերթին մտածել ձեր խղճի մասին՝ ուրիշների խիղճը վատաբանելու փոխարեն: Հաջողություն եմ մաղթում ձեզ ու ոչ միայն ձեզ»։
Արդեն նշեցինք, որ համերգը տեղի էր ունեցել Բաքվում, մինչդեռ երգիչն իր հրապարակման տակ այսպիսի մեկնաբանություն է թողել. «Այն, ինչ ցույց չեն տա հեռուստացույցով: Էմինի մոտ էինք հյուրընկալվել»:
Մեկ այլ օգտատեր երգչի գրառմանն ի պատասխան հարցրել է, թե ինչու երգիչը չի գրել որ Բաքվում է, այլ սահմանափակվել է Էմինի մոտ հյուրընկալվելու մասին հրապարակմամբ:
«Ինչո՞ւ չեք գրում, որ Բաքվում եք, այլ ոչ թե Էմինի մոտ» - գրել է օգտատեր akula_baku-ն:
Նշենք, որ հուլիսի 28-ին Ադրբեջանի մայրաքաղաքում տեղի է ունեցել ռուսական հեռուստաալիքի՝ МУЗ ТВ-ի կազմակերպած մեծ դիսկոտեկ-համերգ՝ «Жара-2019» միջազգային երաժշտական փառատոնի շրջանակում:
