ԵՐԵՎԱՆ, 29 հուլիսի — Sputnik. ՀՀ Փաստաբանների պալատը հայտարարություն է տարածել, որում անդրադարձել է ՀՀ երկրորդ նախագահ Ռոբերտ Քոչարյանի դատական գործով դատավոր Դավիթ Գրիգորյանի նկատմամբ հարուցված քրեական գործին։
«Հաշվի առնելով հանրային հարթակներում ներկայացված մտահոգությունները` փաստաբանների պալատն ուշադրության կենտրոնում է պահելու դատավոր Դավիթ Գրիգորյանի հետ կապված քրեական գործը»,– ասված է պալատի նախագահի մակագրությամբ տարածված հայտարարության մեջ։
Պալատը փաստում է, որ դատական իշխանության ու դատավորների անկախությունն ապահովելը պետք է լինի պետության քաղաքական առաջնահերթություններից և որ փաստաբանությունը կարող է լիարժեք գործել միայն անկախ և անկողմնակալ դատարանի առկայության պայմաններում:
Հայտարարության մեջ նշվում է նաև, որ որոշ ուսումնասիրություններից հետո դատավորի նկատմամբ քրեական հետապնդման հարցը կներկայացվի նաև Փաստաբանների պալատի խորհրդի քննարկմանը:
Հիշեցնենք` պաշտոնեական կեղծիք կատարելու դեպքի առթիվ հարուցված քրեական գործով Դավիթ Գրիգորյանն այս պահին կասկածյալի կարգավիճակ ունի։
Ոչ մի ճաղ չի կարող արգելել մարդուն քաղաքականությամբ զբաղվել. Քոչարյանը չի մտափոխվել
Նրա դեմ հաղորդում տված անձը Սերգո Փանոսյանն է, որը հաղորդում էր ներկայացրել դեռ 2019թ–ի փետրվարի 18-ին, սակայն նախաքննական մարմինն այդ հիմքով քրեական գործի հարուցումը մերժել էր։
Իսկ 2019թ–ի մայիսի 22-ին գործը վերանայվել էր` ի հայտ եկած փաստացի նոր հանգամանքների հիմնավորմամբ։
Դատավոր Դավիթ Գրիգորյանի լիազորությունները կասեցվել են։
