Իրավիճակ չի՞ փոխվել. ՊՆ–ն շարունակում է գույք նվիրել ԵԿՄ–ին

ԵՐԵՎԱՆ, 25 հուլիսի — Sputnik. ՀՀ կառավարության այսօրվա նիստում որոշեց Երկրապահ կամավորականների միությանը որոշ գույք նվիրաբերել, որոշն էլ հանձնել անհատույց ժամանակավոր օգտագործման իրավունքով։ Նվիրաբերվող գույքը հիմնականում խոհանոցային ու անկողնային պարագաներ են` 70 310 434 դրամ ընդհանուր արժեքով։

Որոշումն ընդունվեց առանց զեկուցվելու և քննարկվելու, բայց կառավարության պաշտոնական կայքում հրապարակված նախագծից պարզ է դառնում, որ այն պայմանավորված է Երկրապահ կամավորականների միության եռասերունդ ուսումնամարզական ճամբարի կազմակերպման և գործունեության արդյունավետության բարձրացման անհրաժեշտությամբ, որի նպատակը պատանիներին ռազմահայրենասիրական ոգով դաստիարակելն է:

Որոշման նախագծում նշված է, որ ՀՀ զինված ուժերի անձնակազմի կերակրման կազմակերպումն իրականացվում է ՀՀ կառավարության 2015թ-ի որոշմամբ հաստատված չափաքանակների շրջանակում, որով նախատեսված չէ ԵԿՄ եռասերունդ ուսումնամարզական ճամբարի անձնակազմին ապահովել պարենային միջոցներով՝ պետական բյուջեի հաշվին: Միաժամանակ, ԵԿՄ եռասերունդ ուսումնամարզական ճամբարի անձնակազմին սննդամթերքով, սպասքով, գույքով, տեխնիկական և տնտեսական միջոցներով ապահովման համար ՀՀ ՊՆ ծախսային ծրագրերով պլանավորում չի իրականացվել: ԵԿՄ վարչության անդամների, ինչպես նաև եռասերունդ ուսումնամարզական ճամբարներում ներգրավված անձնակազմի համար իրային ապահովման սահմանված չափաքանակներ նույնպես չկան:

Վերոգրյալով պայմանավորված՝ Երկրապահ կամավորականների միության եռասերունդ ուսումնամարզական ճամբարի կազմակերպմանը աջակցելու և գործունեության արդյունավետությունը բարձրացնելու նպատակով կառավարության որոշմամբ կթույլատրվի ՀՀ պաշտպանության նախարարությանը՝ «Երկրապահ կամավորականների միություն» հասարակական կազմակերպությանը նվիրաբերել այդ կազմակերպության փաստացի օգտագործմանը հանձնված գույքը։

Հիշեցնենք` 2018թ–ին ԵԿՄ նախկին նախագահ Մանվել Գրիգորյանի առանձնատան ու ԵԿՄ տարածքային կառույցների գրասենյակներին հայտնաբերվել էին մեծ թվով «ԶԻՆՎՈՐԻ ԲԱԺԻՆ» գրությամբ պահածոներ ու բանակի համար նախատեսված այլ գույք` ներքնաշորեր, թեյ, սուրճ, բժշկական և հիգիենայի պարագաներ, ծխախոտ, ինչպես նաև զենք։

Մանվել Գրիգորյանը, նրա կինը` Նազիկ Ամիրյանն ու որդին այս փաստերով մեղադրվում են այլ անձանց հետ նախնական համաձայնությամբ, ապօրինի կերպով գույք ձեռք բերելու, յուրացնելու, պետական միջոցները վատնելու և առանձնապես խոշոր չափերով գույքի շորթումը կազմակերպելու համար։

ԵԿՄ վարչությունը 2018թ–ի հունիսի 24–ին հրավիրած նիստում որոշել էր լիազորություններից զրկել Գրիգորյանին: 2019–ի ապրիլի 7–ին ԵԿՄ վարչության նիստ հրավիրվեց և վարչության նախագահի պաշտոնում միաձայն ընտրվեց Սասուն Միքայելյանը։