ԵՐԵՎԱՆ, 23 հուլիսի – Sputnik. Զինծառայողների սննդի կազմակերպման գործընթացում իրականցվող բարեփոխումները հեռուն գնացող նպատակ ունեն։ Sputnik Արմենիայի հետ զրույցում այս մասին ասաց Հայաստանի պաշտպանության նախարարության մամուլի քարտուղար Արծրուն Հովհաննիսյանը։
Նրա խոսքով` հիմա արդեն երկրի զինված ուժերի ղեկավարությունը հասել է նրան, որ բանակի համար նախատեսված պարենամթերքի ընդհանուր ծավալի մոտ 75 տոկոսը գնվում է ներքին շուկայում։
«Դա շատ կարևոր ցուցանիշ է, և այն աստիճանաբար կմեծանա», – նշեց Հովհաննիսյանը։
Նրա խոսքով` տեղական շուկայից օգտվելը ներառվում է բանակի պարենային ապահովման ոլորտում մասշտաբային բարեփոխումների տրամաբանության մեջ։
Հիշեցնենք, որ փետրվարի 21–ին կառավարությունը որոշեց փոփոխություն մտցնել Զինված ուժերի պարենավորման գործընթացում․ եթե մինչև հիմա գործընթացն իրականացվում էր ԶՈՒ–ի միջոցով, ապա որոշման նախագծով առաջարկվել է գործընթացում ներգրավել մասնավոր գործընկերոջ: Ծրագիրը, ի դեպ, փորձնական է։
Պաշտպանության նախարար Դավիթ Տոնոյանը հուլիսի 22–ին հայտնեց, որ ծրագիրն այս պահին գործում է չորս զորամասում։ Շուտով կմիանա հինգերորդը։
Մամուլի քարտուղարի խոսքով` բարեփոխումների փաթեթը ներառում է նաև մի շարք այլ փոփոխություններ։ Մասնավորապես, ամբողջովին նորացվում է թիկունքի սպասքը, կիրառվում են պարենի պահպանման, տեղափոխման նոր տեխնոլոգիաներ (նոր դաշտային խոհանոցներ, սառնարաններ և այլն)։
Նոր համակարգը թույլ է տալիս նաև ճաշարաններից լիովին վերացնել վերակարգերը։ Անձնակազմն այսուհետ չի միջամտի սննդի պատրաստման գործընթացին և կզբաղվի բացառապես մարտական նախապատրաստությամբ։
Խոհանոցային գործերով կզբաղվեն այն մասնավոր ընկերության աշխատակիցները, որը կազմակերպում է զինվորներին սննդով ապահովելու գործընթացը։
Նոր համակարգին անցում կատարելու գործընթացն աստիճանական կլինի։ Ներկա պահին պարենամթերք առաքելու և սննդի կազմակերպման մրցույթում հաղթել են վեց ընկերություն։ Դրանցից միայն մեկն է սկսել իր գործունեությունը։ Մնացածն առաջիկայում աստիճանաբար կմիանան գործընթացին, ինչը թույլ կտա ավելացնել այն զորամասերի քանակը, որտեղ կգործի նոր համակարգը։
