Sputnik Արմենիայի ղեկավար Դմիտրի Պիսարենկոն 1993 – 2001 թվականներին Երևանում ՆՏՎ-ի թղթակիցն է եղել և պահպանել է այդ ժամանակաշրջանի վառ իրադարձությունների տեսադարանը, որը հիմք է դարձել ՆՏՎ-ի հետ համատեղ «Ժամանակի մեքենա» նախագծի իրականացման համար։
1997 թվականին Երևանի կենդանաբանական այգու Ադա անունով առյուծն անհայտ պատճառով հրաժարվել էր հոգ տանել իր երեք նորածին ձագերի մասին։ Ձագուկներին փրկելու համար կենդանաբանականի տնօրեն Սահակ Աբովյանը ստիպված էր իր տանն ապաստան տալ նրանց։
Տնօրենի բնակարանում եռյակի համար պատրաստել էին ստվարաթղթից յուրահատուկ տնակ, որը նաև էլեկտրական ջեռուցիչ ուներ։ Փոքրիկ կորյունների խնամքի հարցում տանտերերին օգնում էին նրանց տնային կենդանիները՝ շունը և թութակը:
Անցյալի հետ տեսակապի միջոցով Sputnik Արմենիայի հարթակում ժամանակ առ ժամանակ կարելի է դառնալ Հայաստանում 1996–2001 թվականներին տեղի ունեցած ուշագրավ իրադարձությունների ականատեսը։ Բոլոր այդ իրադարձությունների մասին հուշերը պահպանվել են Դմիտրի Պիսարենկոյի տեսադարանում։
