ԵՐԵՎԱՆ, 23 հուլիսի — Sputnik, Արմենուհի Մխոյան. Հերթական ինքնափլուզում է գրանցվել Գյումրիում: Այս անգամ` հուլիսի 22–ին, փլուզվել է Գյումրու Տիգրան Մեծ 5 շենքի երկրորդ հարկի բնակարանի պատշգամբի բետոնե հատակը: Բարեբախտաբար, զոհեր ու վիրավորներ չկան: Փրկարարական վարչության աշխատակիցները տարածքը սահմանազատել են: Շենքը վտանգավոր է ոչ միայն բնակիչների, այլ նաև անցորդների համար:
Այս շենքն ընդգրկված է մարզում առաջնահերթ լուծում պահանջող 114 վթարային բնակելիների շարքում: Շիրակի մարզպետարանի քաղաքաշինության վարչության ճարտարապետաշինական բաժնի գլխավոր մասնագետ Մկրտիչ Ասատրյանը Sputnik Արմենիայի հետ զրույցում ասաց, որ հիմնանորոգման համար այս բնակելին միշտ առաջնահերթ է համարվել:
«Գումար լինելու դեպքում առաջնահերթ այս շենքն է հիմնանորոգվելու: Շենքում նախկինում էլ եղել են փլուզումներ: Փլուզվել էին 3-րդ հարկի փայտյա կոնստրուկցիաները: Մենք երկու առանձին մասով ներկայացրել ենք շենքի վերականգնման ծրագիրը: Այս պահին սպասում ենք կառավարության պատասխանին: Պատշգամբները 4-րդ աստիճանի վթարային են, արդեն ենթակա են քանդման»,- նշեց Մկրտիչ Ասատրյանը:
Ի դեպ, սեյսմիկ ծառայության եզրակացությամբ շենքը մասնակի 4-րդ և 3-րդ աստիճանի վթարային է՝ պատշգամբները 4-րդ աստիճանի են, այսինքն՝ ենթակա են քանդման, մնացած մասը 3-րդ աստիճանի է: Շենքն ունի 24 բնակարան, բայց ոչ բոլորն են բնակեցված: Դրա նորոգման համար մոտավորապես անհրաժեշտ է 200 մլն դրամ: «Բայց գումարի չափն ավելի հստակ հնարավոր կլինի ասել հիմնանորոգման նախագծանախահաշվային փաստաթղթերը կազմելիս»,-նշեց Մկրտիչ Ասատրյանը։
Հավելենք, որ Տիգրան Մեծի 5 շենքը երկու մասից է բաղկացած, մի հատվածը տարիներ առաջ ամրացվել է Լինսի հիմնադրամի բնակարանաշինական ծրագրով:
