ԵՐԵՎԱՆ, 20 հուլիսի – Sputnik. Հայաստանի մինչև 19 տարեկանների հավաքականը Եվրոպայի առաջնության խմբային փուլի վերջին խաղում 0:4 հաշվով պարտվեց Պորտուգալիայի հասակակիցներին ու հրաժեշտ տվեց Եվրոպայի առաջնությանը` բաց թողնելով 12 գնդակ և խփելով մեկը: Ա խմբում առաջին և երկրորդ տեղերը զբաղեցրին համապատասխանաբար Պորտուգալիայի և Իսպանիայի հավաքականները:
Հայաստանի հավաքականը պորտուգալացների հետ խաղից առաջ կայացած երկու խաղերում պարտություն էր կրել ու արդեն շանս չուներ կիսաեզրափակիչ դուրս գալու: Իսկ ահա Պորտուգալիայի հավաքականը նախորդ երկու խաղերում վաստակել էր չորս միավոր և խմբում առաջին տեղը գրավելու համար պետք է հաղթեր, քանի որ նույն շանսերը ունեին նաև իսպանացիները զուգահեռաբար ընթացող խաղում:
Խաղի մեկնարկից նախաձեռնությունը պորտուգալացիներին էր: Մեր հավաքական, մեծ ուժերով պաշտպանվելով, հակագրոհում էր: Վտանգավոր պահերով մերոնք զիջում էին մրցակցին, ու կարելի է ասել, որ գոլը մեր դարպասին հասունանում էր, չնայած Հայաստանի հավաքականը պայքարում էր: Բայց գնդակը, այնուամենայնիվ, հայտնվեց մեր թիմի դարպասում:
Իսպանիան Իտալիային հաղթեց Հայաստանում և դուրս եկավ ԵԱ կիսաեզրափակիչ. լուսանկարներ
Տուգանային հրապարակում խախտման համար Հայաստանի հավաքականի դարպասին նշանակվեց 11 մետրանոց, որն էլ հստակ իրացրեց պորտուգալացիների ավագ Վիտոր Պեռեյրան: Բաց թողած գնդակից անմիջապես հետո մեր հավաքականը կարող էր խփել պատասխան գնդակը, բայց եզրափակիչ հարվածը արդյունավետ չստացվեց:
Երկրորդ կեսում Պորտուգալիայի հավաքականը զարգացրեց ձեռք բերած հաջողությունը, և Ժոաու Մարիույի գեղեցիկ գոլից հետո հաղթում էր արդեն 2:0 հաշվով: Հետո, ինչպես ասում են, արդեն տեխնիկայի գործ էր Պորտուգալիայի հաղթանակը: Տյագու Գոյվեան գլխի հարվածով երրորդ գնդակն ուղարկեց մեր թիմի դարպասը: Խաղի ելքը վճռված էր, ու երկու թիմերն էլ ավելի ազատ էին գործում: Չնայած մեր թիմի պայքարելու ցանկությանը զգացվում էր մրցակցի ավելի բարձր վարպետությունն ու փորձը: Այդ պատճառով էլ Տյագու Գոյվեան դուբլ ձևակերպեց, իսկ Պորտուգալիան հաղթեց 4:0 հաշվով:
