Սևանի ճահճացման խնդիրը 1 կամ 2 տարվա խնդիր չէ։ Sputnik Արմենիայի եթերում այս մասին ասաց «Բարգավաճ Հայաստան» խմբակցության պատգամավոր Նաիրա Զոհրաբյանը:
«Տարիներ շարունակ Սևանը թալանվել է, տարբեր պաշտոնյաներ Սևանի մաքրման համար հատկացված գումարը լափել ու թալանել են, և հիմա նրանց մի մասը ծլկել է Հայաստանից»,– ասաց նա։
Զոհրաբյանը նշեց, որ Սևանը ճահճացումից ազատելու համար ԲՀԿ-ն քննարկում է անցկացրել բնապահպանների, կառավարության ներկայացուցիչների, պատգամավորների և բիզնես շահ ունեցող անձանց հետ, և հանդիպումն արդյունավետ է եղել։
«Մենք չփորձեցինք հակադրել բնապահպանական, առողջապահական, բիզնես շահերը, այլ փորձեցինք գտնել համատեղ լուծումներ Սևանի խնդիրները օպերատիվ լուծելու համար: Հնչեց առաջարկ դիմել վարչապետին՝ ստեղծելու հրատապ Սևանի փրկության ծրագիր, որովհետև իրավիճակն այնպիսինն է, որ դանդաղ քայլերով մենք ուղղակի կխորացնենք ստեղծված իրավիճակը»,– նշեց պատգամավորը:
Զոհրաբյանի խոսքով` հանդիպմանը հրավիրել էին նաև «Իմ քայլը» և «Լուսավոր Հայաստան» խմբակցությունների պատգամավորներին, բայց նրանցից որևէ մեկը չի ներկայացել։
Սևանի բնապահպանական ծրագրերի համար փող տրվել է, բայց լճում լողալը մնում է վտանգավոր
