ԵՐԵՎԱՆ, 18 հուլիսի — Sputnik. Նոր Գեղիի նախկին Երևանյան փողոցը կշարունակի մնալ Նոր Գեղիի նախկին ղեկավար Ֆրոնտիկ Թևոսյանի անվամբ. դատարանը վերադարձրել է Կոտայքի մարզպետի դիմումը։ Sputnik Արմենիայի հետ զրույցում այս մասին ասաց Կոտայքի մարզպետ Ռոմանոս Պետրոսյանը։
Ինչպես արդեն հայտնել էինք, Նոր Գեղիի նախկին գյուղապետ Ֆրոնտիկ Թևոսյանն իր ծննդյան 72–րդ տարեդարձի առթիվ գյուղի կենտրոնական` Երևանյան փողոցն անվանակոչել էր իր անունով։ Պետրոսյանը դիմել էր դատարան` փողոցը վերանվանելու համար։
«ՀՀ վարչական դատարանը կասեցրել է իմ ներկայացված դիմումը։ Խնդիրն այն է, որ դատարանը նախ վարույթ էր ընդունել, հետո միայն որոշել կասեցնել դիմումի քննությունն ու վերադարձնել։ Դատարանի որոշման հիմնավորման մեջ նշված է, որ դատարան դիմելու սահմանված ժամկետն արդեն անցել է»,–ասաց մարզպետը։
Նրա խոսքով` իրենք դատարանի որոշումը բողոքարկելու համար 5 օր ունեն, և պատրաստվում են հենց այդ ճանապարհով էլ գնալ։
Պետրոսյանը նշեց նաև, որ Ֆրոնտիկ Թևոսյանն իր անունով էր դարձրել Երևանյան փողոցն իր հարակից բոլոր նրբանցքներով ու փակուղիներով։
Գյուղապետի տեղակալը ծեծել է համագյուղացուն. նրան բերման են ենթարկել
Հիշեցնենք, որ Ֆրոնտիկ Թևոսյանն իր ծննդյան 65-ամյակի կապակցությամբ նաև իր անունով է դարձրել գյուղի արվեստի դպրոցը։
Նա Նոր Գեղիի ղեկավարն է եղել 1985 թվականից և հրաժարական է ներկայացրել 2018 թվականի օգոստոսի 31-ին:
Հիվանդություն Հայաստանի խաղողի այգիներում. պետությունը կօգնի՞ գյուղացուն
