ԵՐԵՎԱՆ, 18 հուլիսի — Sputnik. «Մարդիկ երկար տարիներ անօրինական ճանապարհով փայտահատումներ են իրականացրել ու բիզնես են ստեղծել. նրանց մոտ ստեղծվել էր կարծիք, որ այսօր էլ, թողտվության պայմաններում, կարող են շարունակել իրենց անօրինական բիզնեսը։
Այս մասին Facebook-ի իր ուղիղ եթերում ասել է Տավուշի մարզպետ Հայկ Չոբանյանը։
«Մեր մոտեցումը միանշանակ էր և անդրդվելի` անօրինական որևէ արարք Հայաստանի Հանրապետությունը չի կարող թույլ տալ: Ոչ մի զիջում անօրինականությանը»,–ասել է մարզպետը։
Նա նշել է, որ որևէ անօրինական պահանջ չի կատարվել: Միակ պահանջը, որն իրականացրել ե համահարթեցված գնի սահմանումն է քամատապալ ծառերի համար։ «Եվ ես ինքս էլ հայտարարեցի, որ վաղվանից սկսած Արծվաբերդի անտառտնտեսությունը պատրաստ է քամատապալ 1 խմ-ը 6000 դրամով տրամադրել մարդկանց: Ամեն ինչ կանենք, որպեսզի այդ ընթացակարգերը կրկին պարզեցնենք:
Վաղվանից կառաջարկենք մարզի տարբեր ծրագրերում առկա աշխատատեղերի վերաբերյալ համապատասխան հարցազրույցներ և պատրաստ ենք այդ աշխատատեղերի մասով պայմանագրեր կնքել այն մարդկանց հետ, որոնք անօրինական անտառհատման արգելանքի պատճառով այսօր աշխատանքային խնդիրներ ունեն, սակայն իրենք ևս պետք է պատրաստակամ լինեն»,–ասել է Չոբանյանը:
Մարզպետը նշել է, որ հուլիսի 17–ի կատարվածը դաս էր բոլորի համար: «Հասկացանք, որ մենք մեր տնտեսության մեջ ավելի ուշադիր լինելու և մեր ընթացակարգերը պարզեցնելու խնդիր ունենք: Սա նաև կոռուպցիոն մեխանիզմի դեմ էր, սա պայքար էր կոռուպցիայի դեմ»,- ասել է Չոբանյանը:
Հիշեցնենք, որ հուլիսի 17–ին Իջևանում փայտի գործով զբաղվողները փակել էին միջպետական` Մ4 ճանապարհը, ինչի հետևանքով հարյուրից ավելի մեքենաներ խցանման մեջ են հայտնվել: Երեկոյան ցուցարարների և ոստիկանների միջև բախումներ էին գրանցվել, կան վիրավորներ։
