«Հայոց լեզու և գրականություն» առարկայի միասնական քննությունից մասնակիցների 20 տոկոսի անբավարար գնահատականների պատճառն ամենևին էլ շտեմարններում տեղ գտած փոփոխությունները չեն: Այս մասին Sputnik Արմենիայի հետ զրույցում ասաց Կրթության հարցերով փորձագետ Սերոբ Խաչատրյանը:
Շտեմարանների հետ կապված խնդիրը նոր չէ, և դժգոհությունները տարեցտարի չեն պակասում։ «Խնդիրն այն է, որ այսօր ընդհանրապես սովորելու ձգտումը նվազել է, և վատացել է կրթության ընդհանուր վիճակը»,-ասաց Խաչատրյանը։
Ըստ Խաչատրյանի՝ այն, որ հայոց լեզվի և գրականության քննությունների արդյունքներն ավելի վատն են, քան անգլերենինը, կամ մյուս առարկաներինը, դա դեռ չի նշանակում, որ նշված առարկաների վիճակը լավ է, իսկ հայերենինը՝ վատ։
«Ընդհանուր բոլոր առարկաների վիճակն է վատ։ Սակայն, մասնավորապես հայերենի վատ իմացությունն անդրադառնում է մնացած բոլոր առարկաների իմացության վրա»,-նշեց նա։
Դպրոցի տնօրենների քննության մասնակիցներից 54-ը չեն կարողացել հաղթահարել նվազագույն շեմը
Նրա խոսքով՝ պատճառը պետք է փնտրել դպրոցում. ամեն ինչ սկսվում է տարրական դասարաններից և եթե տարրական դասարաններում ընթերցանությամբ չեն զբաղվում և առաջադրանքները չեն յուրացնում, բարձր դասարաններում և ընդունելության քննությունների ժամանակ իրավիճակն է բարդանում։
Ավարտական քննության որոշ թեստեր նաև ռուսերեն կթարգմանվեն. փոփոխություններ` քննակարգում
«Արդեն կրկնուսույցի մոտ պարապելիս, դիմորդը ստիպված է լինում անգիր անել առաջադրանքները»,-նշում է փորձագետը։ Ի դեպ, լրագրողների հետ զրույցում գնահատման ու թեստավորման կենտրոնի փոխտնօրեն Կարո Նասիբյանը մեկնաբանելով հայոց լեզու և գրականություն առարկաներից անբավարար գնահատականների քանակը, հայտարարել էր, որ շտեմարաններում առաջադրանքների պատասխանների տեղերը փոխվել են, և անգիրներն այս անգամ «չեն աշխատել»:
