Երիտասարդ աղջիկը տարիներ շարունակ շահագործման է ենթարկվել Շիրակի մարզի անասնապահական ֆերմաներից մեկում, ապրել գոմում, ենթարկվել բռնության։ Թրաֆիքինգի դասական դեպքը բացահայտվել է միայն այն ժամանակ, երբ 8 տարվա գերությունից հետո նրան հաջողվել է փախչել։
Դեպքի մասին մանրամասներ են ներկայացվում ՀՀ ոստիկանության պաշտոնական կայքում հրապարակված տեսանյութում։
Դրանում նշվում է, որ դեպքը բացահայտվել է ՀՀ ոստիկանության Արարատի մարզային բաժնի աշխատակիցների ջանքերով։ Նրանք ս.թ. հունիսին տեղեկություն են ստացել, որ 8 տարվա գերությունից հետո աղջիկը փախել է Շիրակի մարզից, սարերով հասել Ապարան ու թաքնվել հովիվներից մեկի մոտ:
Հենց այդտեղ էլ ոստիկանները գտել են նրան ու բացահայտել տեղի ունեցածը: Աղջիկը ոստիկաններին պատմել է, որ չի էլ հիշում, թե ինքը քանի տարեկան է եղել, երբ իր ազգականներից մեկն իրեն Վրաստանից բերել է Հայաստան, թողել այստեղ ու հեռացել: Փոքրիկ աղջիկը մենակ մնալով` ապրել է սարերում, մի կտոր հացի կամ հագուստի դիմաց աշխատել տարբեր անձանց մոտ, նույնիսկ փող է վաստակել, բայց շահագործման չի ենթարկվել:
Երևանում փողոցային առևտրով զբաղվողներին թրաֆիքինգի են ենթարկել. տեսանյութ
Շահագործումը սկսվել է 2011թ.–ից, երբ Շիրակի գյուղերից մեկում գտնվող անասնաֆերմայի տերն իրեն աշխատանք ու աշխատավարձ է խոստացել, բայց չի վճարել` ստիպելով կատարել տարբեր աշխատանքներ:
Աղջիկը պատմել է, որ եթե այդ ընթացքում կենդանիներից մեկը սատկել կամ վնասվել է, տղամարդը մեղադրել է իրեն ու այդ պատճառաբանությամբ զրկել վարձատրությունից։
«Տղամարդը խոստացել է, որ կհանի անձնագիր և կօգնի գտնել մորը: Այս խոստումը, ըստ աղջկա, պատճառ է հանդիսացել, որ ինքը համաձայնել է աշխատել տղամարդու ֆերմայում»,– մեկնաբանում է Ոստիկանության Արարատի մարզային վարչության Արտաշատի բաժնի համայնքային ոստիկան Լուսինե Հարությունյանը, որը մասնակցել է օպերատիվ աշխատանքներին։
«Տղամարդը նրա նկատմամբ պարբերաբար բռնություն գործադրելու սպառնալիքով հարկադրանքով պահել է գոմում և առանց որևէ վճարի աշխատեցրել»,– պատմում է Հարությունյանը։
Ստրկությունից ազատված աղջիկը ոստիկաններին նաև ասել է, որ տարիների ընթացքում մի քանի անգամ փորձել է փախչել, բայց տղամարդը միշտ նրան գտել է, հետ բերել գոմ ու ծեծել՝ սպառնալով, որ կրկնվելու դեպքում խեղդելով կսպանի:
Հայաստանում 2018 թվականին բացահայտվել է թրաֆիքինգի 9 դեպք
Դեպքի առթիվ թրաֆիքինգի փաստով հարուցվել է քրեական գործ, որն ուղարկվել է Քննչական կոմիտե` նախաքննության։
Իսկ գերությունից ազատված աղջիկը, ինչպես հայտնում է ոստիկանության տեսանյութը, տեղափոխվել է «Հույս և օգնություն» ՀԿ-ի ապաստարան` մասնագիտացված հոգեբանական աջակցություն ստանալու համար։
Տեսանյութում, սակայն, նշվում է, որ նա միայն մեկ նպատակ ունի՝ վերադառնալ Վրաստան ու գտնել մորը:
