ԵՐԵՎԱՆ, 14 հուլիսի — Sputnik. Առաջիկայում 92 բնակարան կտրամադրվի սոցիալական տարբեր խմբերի, իսկ երիտասարդ ընտանիքներին` հիպոթեքային մատչելի պայմաններ: Այս մասին հայտնել են Արցախի Հանրապետության պետական նախարար Գրիգորի Մարտիրոսյանին` Մարտունի կատարած այցի ժամանակ, տեղեկանում ենք Արցախի կառավարության պաշտոնական էջից։
«Շինարարությունն իրականացնող «Ֆերզիտ» ընկերության տնօրեն Արթուր Խաչատրյանը վստահեցրել է, որ կարճ ժամանակահատվածում կավարտվի ներքին և արտաքին հարդարման աշխատանքները: Գրիգորի Մարտիրոսյանը անձամբ է ստուգել աշխատանքների որակը, իսկ շենքերից մեկի նկուղային հարկում ծանոթացել ռմբապաստարանի կառուցման ընթացքին»,–նշված է ԱՀ կառավարության կայքում։
Մարտիրոսյանը, խոսելով սոցիալական տարբեր խմբերի նկատմամբ պետության ունեցած պարտավորություններից, ընդգծել է բնակարանային խնդիր ունեցող քաղաքացիների հերթացուցակները կարճ ժամանակահատվածում ճշգրտելու անհրաժեշտությունը:
Վարչակազմի ղեկավար Արարատ Մելքումյանը, ի պատասխան պետնախարարի դիտարկմանը, նշել է, որ վարչակազմում տեղի ունեցած բնակարանային հարցերով հանձնաժողովի հերթական նիստում առաջնահերթ է որակվել 14 բնակարանի տրամադրումը զոհված ազատամարտիկների, իսկ 3-ը՝ առաջին կարգի հաշմանդամություն ունեցողների ընտանիքներին։
Պետնախարարը պահանջել է բնակարանային այս ու խնդրահարույց՝ Մարտունու վթարային շենքերի շուրջ հստակ առաջարկություններով հանդես գալ մեկ շաբաթվա ընթացքում:
Հիշեցնենք, որ Արցախի Մարտունու շրջանում բազմաբնակարան թաղամասի շինարարությունն ընթանում է պետպատվերի շրջանակներում։ Այժմ շինարարության արդեն իսկ երկրորդ փուլն է ընթանում։
Դեռ 2017–ին շահագործման էր հանձնվել թաղամասի առաջին շենքը. նոր բնակարանների բանալիներ էին հանձնել 67 թոշակառու և ծառայության մեջ գտնվող զինվորականների ընտանիքների:
