ԵՐԵՎԱՆ, 11 հուլիսի – Sputnik. ՀՀ կառավարության «Հայաստանի Հանրապետության հակակոռուպցիոն ռազմավարությունը և դրա իրականացման 2019-2022 թվականների միջոցառումների ծրագիրը հաստատելու մասին» նախագիծը հուլիսի 11-ին ներկայացվեց Շիրակի մարզի շահագրգիռ կազմակերպությունների ներկայացուցիչներին։
Հանրային քննարկման ժամանակ պարզվեց, որ հանրությունն Արդարադատության նախարարությունից ակնկալում է մի շարք հարցերի պատասխաններ, օրինակ` որո՞նք են հակակոռուպցիոն պայքարի ընթացքում քննչական մարմինների ճիշտ գործողությունները, արդյո՞ք կբացահայտվեն լավ թաքցրած ակտիվները:
![Ինչպե՞ս է Հայաստանը պայքարելու կոռուպցիայի դեմ. շիրակցիներին էլ է մտահոգում այս հարցը Ինչպե՞ս է Հայաստանը պայքարելու կոռուպցիայի դեմ. շիրակցիներին էլ է մտահոգում այս հարցը - Sputnik Արմենիա](https://cdn.am.sputniknews.ru/img/1956/91/19569147_0:0:1328:996_600x0_80_0_0_064b7426216dc5b9161d7be8ee0a168c.jpg)
«Մենք տեսել ենք, որ Հատուկ քննչական ծառայությունում գումար է նախատեսված ուսուցման համար, բայց այստեղ շատ լուրջ ու խորը կարողությունների ստեղծման մասին է պետք մտածել: Ինչպե՞ս պետք է մեր ձեռքերը հասնեն այդ հեռավոր թաքստոցներում շատ խելացի ձևով պահված ակտիվներին: Միգուցե սա քննարկումների ամենակարևոր մասն է և սպասելիքը ամբողջ ռազմավարությունից: Հենց այստեղ մենք ձախողելու տեղ չպետք է ունենանք, եթե մենք դա չանենք, խորը հիասթափություն է լինելու՝ լուրջ հետևանքներով»,- ասաց Իրավաբանների հայկական ասոցիացիայի նախագահ Կարեն Զադոյանը:
«Շատ գործարարների կգրավի». Իսրայելի դեսպանը` Գյումրիում նախատեսված խոշոր նախագծի մասին
Այս նկատառումների մեծ մասի հետ ՀՀ արդարադատության նախարարի տեղակալ Տիգրան Խաչիկյանը համաձայնեց։
«Նկատառումներից շատերнն անչափ կարևոր են, և ես համաձայն եմ դրանց հետ: Նախ` պատժի անխուսափելիության սկզբունքի հետ կապված՝ համալիր լուծում է պահանջվում, և շատ խորքային, իսկ ամենակարևորը` պետք է ճիշտ տանք կոռուպցիոն հանցագործությունների ձևակերպումը՝ բացահայտելով, թե որոնք են համարվում կոռուպցիոն հանցագործություններ: Քննարկման փուլում են գտնվում նաև օպերատիվ հետախուզական միջոցառումների կարգավորումները»,- նշեց նա։
Քննարկման ընթացքում հնչեց նաև այսպիսի դիտարկում՝ կոռուպցիան կվերանա միայն կոռուպցիան ծնող երևույթի կանխարգելման՝ ցածր աշխատավարձերի բարձրացման դեպքում:
![Ինչպե՞ս է Հայաստանը պայքարելու կոռուպցիայի դեմ. շիրակցիներին էլ է մտահոգում այս հարցը Ինչպե՞ս է Հայաստանը պայքարելու կոռուպցիայի դեմ. շիրակցիներին էլ է մտահոգում այս հարցը - Sputnik Արմենիա](https://cdn.am.sputniknews.ru/img/1956/91/19569136_0:0:1600:1200_600x0_80_0_0_dab6edc7f47902fe4bfdc04655ef8ec7.jpg)
Հանդիպման ընթացքում Արդարադատության նախարարի տեղակալ Տիգրան Խաչիկյանը, շնորհակալություն հայտնելով հասարակական կազմակերպություններին ակտիվ մասնակցության համար, կարևորեց շահագրգիռ հասարակական կազմակերպությունների ներգրավվածությունը փաստաթղթի մշակման գործում:
Փոխնախարարը խոստացավ անպատասխան չթողնել լավագույն դիտարկումները:
Քննարկումը կազմակերպել էին ՀՀ արդարադատության նախարարությունն ու «Իրավաբանների հայկական ասոցիացիա» հասարակական կազմակերպությունը։