ԵՐԵՎԱՆ, 10 հուլիսի — Sputnik. Երևանի բուժհաստատությունները, չնայած էլեկտրաէներգիայի զանգվածային անջատմանը, շարունակում են նորմալ աշխատել։ Sputnik Արմենիայի հետ զրույցում այս մասին ասաց առողջապահության նախարարության մամուլի քարտուղար Ալինա Նիկողոսյանը։
Երևանում ու որոշ մարզերում էներգամատակարարումն այսօր դադարեցվել էր։ Գնացքները մնացել էին մետրոյի կայարանների թունելներում, բայց բոլոր ուղևորները տարհանվել էին։ Փրկարարները հերթապահում էին մարդաշատ վայրերում։ Նաև կապի խափանումներ էին եղել։ Մի շարք բանկեր անցել էին պահուստային էներգամատակարարման։
Sputnik Արմենիան կապ հաստատեց բժշկական մի շարք կենտրոնների հետ։ Պարզվեց` անջատումները չեն անդրադարձել նրանց աշխատանքի վրա, քանի որ պահուստային էներգասնուցման են անցել, և նախատեսված բոլոր վիրահատություններն իրականացվել են ժամանակին։
Խմբագրությունն ահազանգ էր ստացել, որ էլեկտրամատակարարման հետևանքով «Քանաքեռ-Զեյթուն» բժշկական կենտրոնում վիրահատությունները դադարեցվել են։ Առողջապահության նախարարությունում հերքեցին այդ տեղեկությունը` վստահեցնելով, որ բոլոր սկսված վիրահատություններն ավարտի են հասցվել, իսկ դեռ չսկսվածները չեն հետաձգել են։ ԲԿ–ի աշխատանքը իր հունով է ընթանում։
Հիշեցնենք` այսօր ժամը 13։00–ից Երևանում ու մարզերում էլեկտրաէներգիայի զանգվածային անջատումներ են գրանցվել։ Փոխվարչապետ Տիգրան Ավինյանը Facebook-ում հայտնել է, որ հոսանքի համատարած անջատումները պայմանավորված են Երևան ՋԷԿ–ում ու Հրազդան ՋԷԿ–ում տեղի ունեցած վթարներով։ Այս պահին Երևան ՋԷԿ-ն արդեն վերագործարկվել է։
