ԵՐԵՎԱՆ, 8 հուլիսի — Sputnik. Ռուսաստանցի զբոսաշրջիկները զանգվածաբար սկսել են չեղարկել իրենց ամրագրումները Վրաստանի Կախեթիայի շրջանի մի քանի քաղաքների, Բաթումի և Քութայիսի հյուրանոցներում։ Այս մասին հայտնել է Վրաստանի զբոսաշրջային ազգային գործակալության ղեկավար Մարիամ Կվրիվիշվիլին, փոխանցում է ՌԻԱ Նովոստին։
Սա կապված է ինչպես Ռուսաստանից Վրաստան ավիաչվերթների չեղարկման, այնպես էլ բազմաթիվ սկանդալների հետ, որոնք այժմ հրահրում է վրացական ընդդիմությունը։
Մարիամ Կվրիվիշվիլու հայտարարությամբ` Աջարիան և ծովամերձ քաղաքը լուրջ մարտահրավերի առաջ են կանգնել. մեծ քանակի հյուրանոցային ամրագրումներ են չեղարկվել։ Բնակչությունն այժմ խնդրում է և պահանջում պահպանել առկա շուկան։ Նույն իրավիճակն է Կախեթիում և Քութայիսում։
«Տեղի բնակիչները հետաքրքրվում են, թե ինչպես է կառավարությունը մտադիր գործել, որպեսզի պահպանի Ռուսաստանից զբոսաշրջային հոսքը։ Այդ շրջանների բնակչության համար զբոսաշրջությունն ամենակարևոր, երբեմն էլ նույնիսկ միակ եկամտի աղբյուրն է», – հայտարարել է Կվրիվիշվիլին։
«Խստորեն դատապարտում ենք «Ռուսթավի 2» հեռուստաալիքի հաղորդավարի արարքը». Դմիտրի Պեսկով
Հիշեցնենք, որ ՌԴ նախագահն ավելի վաղ հրաման էր ստորագրել` արգելելով հուլիսի 8-ին ռուսական ավիաընկերություններին օդային ուղևորափոխադրումներ իրականացնել Ռուսաստանից Վրաստան, իսկ տուրօպերատորներին խորհուրդ է տրվել Վրաստանի ուղղությամբ ուղեգրեր չվաճառել։
