ԵՐԵՎԱՆ, 5 հուլիսի — Sputnik. ՀՀ և Արցախի արտգործնախարարներ Զոհրաբ Մնացականյանն ու Մասիս Մայիլյանն Արցախում ստորագրել են Հայաստանի և Արցախի արտգործնախարարությունների միջև խորհրդակցությունների պլան։ Sputnik Արմենիային այս մասին հայտնեց ԱԳՆ մամուլի խոսնակ Աննա Նաղդալյանը։
Նա տեղեկացրեց նաև, որ խորհրդակցությունների պլանով նախատեսվում է 2019-2020 թթ.–ին անցկացնել կանոնավոր խորհրդակցություններ արցախյան հիմնախնդրի և արտաքին քաղաքական հետաքրքրություն ներկայացնող հարցերի շուրջ:
![Հայաստանի ու Արցախի արտգործնախարարները համատեղ խորհրդակցությունների պլան են մշակել Հայաստանի ու Արցախի արտգործնախարարները համատեղ խորհրդակցությունների պլան են մշակել - Sputnik Արմենիա](https://cdn.am.sputniknews.ru/img/1947/57/19475797_0:0:1000:667_600x0_80_0_0_6243e6709ddd9bbcdf57e2119ea9fe3b.jpg)
Աշխատանքային այցով Արցախում գտնվող Զոհրաբ Մնացականյանը Մասիս Մայիլյանին հանդիպել է այսօր` հուլիսի 5-ին։
Ըստ ԱԳՆ–ի հաղորդագրության` Մնացականյանը կարևորել է նման ձևաչափով կանոնավոր հանդիպումների անցկացումը, ինչը լավ հնարավորություն է ընձեռում հանգամանալից անդրադառնալու, գնահատելու Լեռնային Ղարաբաղի խաղաղ գործընթացի ներկա փուլը և ուղենշելու հետագա քայլերը:
Հիշեցնենք` երեկ` հուլիսի 4-ին, ՀՀ արտգործնախարարը հանդիպել էր նաև Արցախի նախագահ Բակո Սահակյանի հետ։ Շուրջ 3 ժամ տևած հանդիպման ընթացքում քննարկվել էին արցախյան հարցի կարգավորման ներկա փուլին, այդ թվում` բանակցային գործընթացում արցախյան կողմի մասնակցությանը վերաբերող հարցեր։
Առանց Ստեփանակերտի անհնար է կարգավորել ղարաբաղյան հակամարտությունը. Նիկոլ Փաշինյան