ԵՐԵՎԱՆ, 4 հուլիսի — Sputnik. Ռուսական կողմը պատրաստակամ է Հայաստանի հետ քննարկել գազի ներքին սակագների նվազեցման հարցը։ Այս մասին այսօր, կառավարության նիստից հետո լրագրողների հետ զրույցում ասաց Հանրային ծառայությունները կարգավորող հանձնաժողովի նախագահ Գարեգին Բաղրամյանը։
«Երկուստեք բավականին գործընկերային բանակցություններ ենք իրականացնում»,– ասաց Բաղրամյանը։
Նա նշեց, որ ռուսական կողմի հետ գազի գնի շուրջ բանակցություններն ընթացքի մեջ են։ Բայց պաշտոնյան դժվարացավ դրանց ավարտի նույնիսկ մոտավոր ժամկետներ նշել։
Ինչ վերաբերում է սահմանին գազի գնի վերանայմանը, Գարեգին Բաղրամյանը հայտնեց, որ այդ բանակցություններին ինքը չի մասնակցում։
Նշենք, Գարեգին Բաղրամյանը հայտարարել էր, որ ծախսերի օպտիմալացման համար ՀԾԿՀ ընդունած որոշմամբ «Գազպրոմ Արմենիային» հնարավորություն է տրվել հաստիքացուցակի որոշակի կրճատումներ անելու։ «Գազպրոմ Արմենիան» պատրաստակամություն էր հայտնել առաջիկա 5 տարվա ընթացքում կրճատել 1000 աշխատակից։
Երևանն ու Մոսկվան գազի շուրջ համաձայնության կգա՞ն. փորձագետը՝ հիմնական խոչընդոտների մասին
Հիշեցնենք` ՌԴ նախագահ Վլադիմիր Պուտինի հետ հանդիպումից հետո, հունիսի 6-ին ՀՀ վարչապետ Նիկոլ Փաշինյանն ասել էր, որ հույս ունի, որ Երևանն ու Մոսկվան գազի գնի հարցում լեզու կգտնեն։
2019 թվականի հունվարի 1–ից սահմանին Հայաստանը Ռուսաստանից գազը ստանում է հազար խորանարդ մետրի դիմաց 165 դոլար գնով՝ նախկին 150-ի փոխարեն։ Իսկ բնակչության համար սակագինը նույնն է մնացել ընկերության ծախսերի կրճատման հաշվին։ Այս կապակցությամբ «Գազպրոմ Արմենիան» հիմա անձնակազմի կրճատման ու ծախսերի օպտիմալացման հարցեր է քննարկում։ Հակառակ դեպքում սպառողների համար սակագնի պահպանումը կարող է հսկայական պարտքերի հասցնել ընկերությանը։
«Գազպրոմ Արմենիան», որը 100%–ով պատկանում է ռուսաստանյան «Գազպրոմին», գազ է մատակարարում Հայաստանի ներքին շուկային։
