ԵՐԵՎԱՆ, 30 հունիսի — Sputnik. Անհրաժեշտության դեպքում Իրկուտսկի մարզի ջրհեղեղի դեմ պայքարին կարող է միանալ բանակը։ Ինչպես ասել է լրագրողների հետ զրույցում ՌԴ նախագահի մամուլի խոսնակը, Վլադիմիր Պուտինը նման հանձնարարություն է տվել պաշտպանության նախարար Սերգեյ Շոյգուին։
Որոշումը կայացվել է ջրհեղեղի հետևանքների վերացման վերաբերյալ Բրատսկում ծավալված օպերատիվ ժողովից հետո։ Այս մասին հայտնում է ՌԻԱ Նովոստին։
Երեկ Վլադիմիր Պուտինը ժամանել է Իրկուտսկի մարզ, որտեղ հորդառատ անձրևը գետերի բարձրացման է հանգեցրել։
31 բնակավայրեր հայտնվել են աղետի գոտում, ավելի քան 3,7 հազար տուն ջրի տակ են մնացել։ Վերջին տվյալների համաձայն՝ ջրհեղեղի հետևանքով հինգ մարդ է մահացել, 112-ը հիվանդանոց են տեղափոխվել։
Տուժածների համար հումանիտար օգնություն է հավաքվում, իսկ աղետի գոտի պետական նյութական պաշարից բեռ է հասցվել։
Նախագահը հանձնարարել է սկսել փոխհատուցումներ վճարել տուժածներին։ Նա հանձնարարել է նաև աղեղի հետևանքների վերացման կառավարական հանձնաժողով ստեղծել։ Հուլիսի 3-ին Վլադիմիր Պուտինը լսելու է հանձնաժողովի զեկույցը։
