Sputnik Արմենիայի հետ զրույցում, անդրադառնալով Օսակայում անցկացվող G20-ի գագաթնաժողովի շրջանակում Թրամփ-Պուտին հանդիպմանը, միջազգայնագետ Սուրեն Սարգսյանը կարծիք է հայտնում, որ այն շատ կարևոր է ներկայում ստեղծված աշխարհաքաղաքական իրավիճակի տեսանկյունից։
«ԱՄՆ-Ռուսաստան հարաբերությունները կարևոր են ոչ միայն երկու երկրների, այլև համաշխարհային քաղաքական գործընթացների տեսանկյունից»,-կարծում է Սարգսյանը։
Ըստ միջազգայնագետի՝ երբ Վաշինգտոնն ու Մոսկվան մրցակցում են աշխարհի տարբեր տարածաշրջաններում ազդեցությունների տարածման համար, դա բավականին կոշտ և շատ հաճախ նաև ագրեսիվ մրցակցություն է։
«Այդ առումով չափազանց կարևոր է, որ այս երկու գերտերությունները կարողանան գալ ընդհանուր հայտարարի՝ ամենատարբեր հարցերի շուրջ, որովհետև դրանով իսկ հնարավոր է լինում մեղմել շատ ճգնաժամային իրավիճակներ՝ աշխարհի տարբեր անկյուններում»,-ասում է Սուրեն Սարգսյանը։
Նրա կարծիքով, եթե կողմերը գոհ են հանդիպման արդյունքներից, ապա համաշխարհային հանրությունը ևս պետք է գոհ լինի դրանցից։
