ԵՐԵՎԱՆ, 28 հունիսի — Sputnik. Ռուսաստանի և ԱՄՆ-ի նախագահներ` Պուտինի և Թրամփի հանդիպումը ճապոնական Օսակայում տևեց 1 ժամ 20 րոպե, հայտնում է RT–ն։
Գերտերությունների ղեկավարները հանդիպել են Ճապոնիայում այս օրերին ընթացող G20-ի՝ «Մեծ քասանյակի» գագաթնաժողովի շրջանակում։
Հանդիպման սկզբում Ամերիկայի առաջնորդն ասաց. «Vladimir, thank you very much!»։
Նախագահները քննարկել են հարցերի մի ամբողջական փաթեթ` հայտարարելով, որ հարաբերությունների բարելավումը երկու երկրների և ամբողջ աշխարհի շահերից է բխում։ «Մենք շատ հետաքրքիր բանավեճ կունենանք, որը կներառի առևտրի, զինաթափման հարցերը։ Եվ այդ ամենը կառուցված կլինի մեր շատ լավ հարաբերությունների վրա։ Կարծում եմ` հանդիպման արդյունքները հիանալի կլինեն», – ասել է Թրամփը մինչև հանդիպումը։
Ինչպես հայտնում են ԶԼՄ–ները, Թրամփն ու Պուտինը քննարկել են Իրանին, Ուկրաինային, Սիրիային, Վենեսուելային վերաբերող թեմաներ։
Բացի այդ, ԱՄՆ նախագահը մատնանշել է սպառազինության վերահսկողության ժամանակակից համակարգում Չինաստանին ներառելու անհրաժեշտությունը։
Ռուսաստանի առաջնորդն իր հերթին այս հանդիպումը լավ հնարավորություն է որակել Հելսինկյան բանավեճը շարունակելու համար։
«Մեր գործընկերներն աշխատում էին և լավ հնարավորություն են ստեղծել շարունակել այն, ինչի մասին պայմանավորվել ենք Հելսինկիում», – ասել է Պուտինը։
Երկու երկրների առաջնորդների առաջին լայնաֆորմատ հանդիպումը տեղի էր ունեցել 2018 թվականի հուլիսի 16-ին։ Պուտինն ու Թրամփը քննարկել էին երկկողմ հարաբերությունների կարգավորման և զարգացման ուղիները, ինչպես նաև միջազգային օրակարգի արդիական հարցեր։ Բանակցությունների ավարտին Ռուսաստանի և ԱՄՆ-ի նախագահները հայտարարություններ էին արել մամուլի համար և պատասխանել ԶԼՄ–ների ներկայացուցիչների հարցերին։ Հանդիպման արդյունքում երկու երկրների առաջնորդները հայտարարել էին ՌԴ–ի և ԱՄՆ–ի հարաբերությունները բարելավելու հարցում իրենց շահագրգռվածության մասին։
Թրամփն ու Պուտինը կհանդիպեն Ճապոնիայում. բանակցության թեմաները հայտնի են
