ԵՐԵՎԱՆ, 27 հունիսի – Sputnik. ՀՀ արտաքին գործերի նախարար Զոհրաբ Մնացականյանը չի հավատում, որ հնարավոր է մեկ ձեռքով բանակցել, մյուսով` կրակել։ Այս մասին այսօր` Մալթայի արտաքին գործերի և առևտրի խթանման նախարար Կարմելո Աբելայի հետ համատեղ ասուլիսի ժամանակ, ասաց Մնացականյանը։
«Մենք չենք հավատում, որ հնարավոր է էֆեկտիվ գործնական առաջընթաց լինի Լեռնային Ղարաբաղի խաղաղ կարգավորման գործընթացում, երբ սահմանին լարված իրավիճակ է։ Բանակցային գործընթացում սպառնալիքի լեզուն չի աշխատում, և չի լինելու այնպիսի իրավիճակ, երբ մենք բանակցենք սպառնալիքի վտանգի լույսի ներքո։ Մեր ինքնավստահությունը բավական մեծ է, և այդ առումով սպառնալիքն ընդունողը չենք»,–ասաց նախարարը։
Անդրադառնալով հունիսի 21–ին իր և Ադրբեջանի արտգործնախարար Էլմար Մամեդյարովի վաշինգտոնյան հանդիպման ժամանակ քննարկված հարցերին` Մնացականյանը նշեց, որ հենց լարվածության նվազեցման թեման էլ քննարկված հարցերից մեկն է եղել։
Նրա խոսքով` իր և Մամեդյարովի վաշինգտոնյան հանդիպումն առանձնահատուկ էր այնքանով, որ սահմանին լարվածության որոշակի աճ կար, ինչը չէր կարող իր ազդեցությունը չունենալ հանդիպման վրա։
«Վաշինգտոնում քննարկել ենք հարցերի լայն շրջանակ, դրանք կառուցվել են այն երկխոսության վրա, որը տեղի է ունեցել մինչ վաշինգտոնյան հանդիպումը։ Քննարկեցինք լարվածությունը նվազեցնելու և լրացուցիչ զարգացումներից խուսափելու հնարավոր բոլոր քայլերը։ Սակայն մեզ անհրաժեշտ էր անդրադառնալ նաև իրավիճակին, որը մինչև լարումն էր»,–ասաց նախարարը։
Նրա կարծիքով` երկու կողմերն էլ կկարողանան հասնել այն իրավիճակին, որ մինչև հաջորդ հանդիպումը կլինի խաղաղ գործընթացին նվազող միջավայր։
Նախարարն անդրադարձավ նաև զինադադարի խախտման հետաքննության մեխանիզմի թեմային և նշեց, որ այդ առումով մոնիթորինգի կարողությունների ուժեղացման ուղղությամբ էլ քայլեր պետք է արվեն. Վիեննայում ու Սանկտ Պետերբուրգում ձեռքբերված պայմանավորվածություններն այդ մասին էին փաստում։
«Մամեդյարովի հետ հանդիպման ժամանակ անդրադարձել ենք նաև ԼՂ կարգավիճակի և իրավունքի ինքնորոշման իրագործման հարցին։ Ես նշել եմ, որ այն մեզ համար առաջնային հարց է»,–ասաց նա` հավելելով, որ հանդիպումների դինամիկան մտադիր են շարունակել։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի հանդիպումը կայացել է հունիսի 20-ին։
Հունիսի 24-ին Մամեդյարովը հայտարարել էր, որ իր և ՀՀ արտգործնախարարի վաշինգտոնյան բանակցությունների ընթացքում Մինսկի խմբի համանախագահները կողմերին նոր փաստաթղթեր են ներկայացրել, որոնց վրա աշխատելու են 2-3 ամիս։
Մնացականյանն ու Մամեդյարովը վաշինգտոնյան բանակցությունների առաջ հանդիպել էին մայիսի 13-ին Բրյուսելում Արևելյան գործընկերության 10-ամյակին նվիրված նախարարական հանդիպման շրջանակում։
