Թուրքագետ Վարուժան Գեղամյանը Sputnik Արմենիայի հետ զրույցում, մեկնաբանելով հունիսի 23-ին անցկացված Ստամբուլի քաղաքապետի ընտրությունների արդյունքները, ասում է, որ չի կիսում Թուրքիայի քրդամետ ժողովրդադեմոկրատական կուսակցության հայ պատգամավոր Կարո Փայլանի այն տեսակետը, թե «Մեկ մարդու իշխանությունը տապալված է»:
«Ստամբուլի ընտրությունների արդյունքներով ասել, որ Էրդողանի իշխանությունը տապալվել է, տեղին չէ»,- ասում է թուրքագետը։
Վարուժան Գեղամյանն ավելի շատ հակված է մտածել, որ դա մեկ կոնկրետ վայրում ընդդիմության տակտիկական ճիշտ կողմնորոշման շնորհիվ ձեռք բերված արդյունք է։
«Նույն Ստամբուլում, բացի քաղաքապետի պաշտոնից, ըստ էության մնացած բոլոր իշխանական, վարչական միավորները շարունակում են գտնվել գերազանցապես իշխող «Արդարություն և զարգացում» կուսակցության վերահսկողության ներքո»,-նկատում է Գեղամյանը։
Ըստ Վարուժան Գեղամյանի, ընտրություններում հաղթած Իմամօղլուին բավականին մեծ խնդիրներ են սպասվում նրա գործունեության ընթացքում, քանի որ նրա որոշումները, որոնք պետք է հաստատվեն խորհրդի կողմից, իշխանության ներկայացուցիչները կարող են տապալել։
Հիշեցնենք, որ հունիսի 23–ին Ստամբուլի քաղաքապետի ընտրություններում հաղթել է Թուրքիայի ընդդիմադիր «Ժողովրդահանրապետական» կուսակցության թեկնածու Էքրեմ Իմամօղլուն՝ ստանալով քվեների 54%-ը: Նրա գլխավոր մրցակիցը՝ իշխող «Արդարություն և զարգացում» կուսակցության թեկնածու, երկրի նախկին վարչապետ Բինալի Յլդըրըմը, ընդունել է իր պարտությունը:
