ԵՐԵՎԱՆ, 24 հունիսի — Sputnik. ԵԱՀԿ ՄԽ համանախագահների առաջարկները, ամենայն հավանականությամբ, հիմնված են այն նույն այսպես կոչված «Կազանի փաստաթղթի» վրա: Sputnik Արմենիայի հետ զրույցում նման կարծիք հայտնեց քաղաքագետ Երվանդ Բոզոյանը` մեկնաբանելով Ադրբեջանի արտգործնախարար Էլմար Մամեդյարովի հայտարարությունը։
Ավելի վաղ` երկուշաբթի Մամեդյարովը հայտարարել էր, որ Երևանն ու Բաքուն 2-3 ամիս կաշխատեն ԵԱՀԿ ՄԽ համանախագահների Վաշինգտոնում տեղի ունեցած հանդիպման ժամանակ ներկայացրած նոր փաստաթղթերով։
«Վաշինգտոնում համանախագահներն առաջարկեցին դուրս բերել զորքը և խաղաղապահներ տեղակայել։ Բայց այս հարցի վրա աշխատել է պետք», – Մամեդյարովի խոսքը մեջբերել էին Ադրբեջանական ԶԼՄ-ները։ Ավելի ուշ խաղաղապահների մասով Մամեդյարովին վերագրվող հատվածը հեռացվել էին լրատվամիջոցներից՝ պատճառաբանելով, թե դա չի համապատասխանում իրականությանը:
«Մամեդյարովի հայտարարությունը բավականին կցկտուր էր։ Տպավորություն է ստեղծվում, թե նա ուզում էր ներկայացնել բանակցությունների որոշակի կոնկրետ մաս», – ասաց Բոզոյանը։
Ինչպես նշեց փորձագետը` Ադրբեջանի արտգործնախարարի խոսքերը ընդհանուր բնույթ են կրում, դրանք դժվար է վերլուծելը, բայց հետաքրքիր է այն, որ հանդիպմանը նոր առաջարկներ են հնչեցվել, և կողմերը ժամանակ են վերցրել մտածելու համար։
Ընդ որում` Բոզոյանն ընդգծեց, որ հասարակությանը հարկ է ավելի մանրամասն բացատրել, թե ինչ «հավելյալ կոմպոնենտների» մասին է խոսքը։
«Մյուս կողմից, ինչ էլ լինի, իմ կարծիքով, խոսքը «Կազանի փաստաթղթերի» (խմբագրված «Մադրիդյան սկզբունքներ» – խմբ.) շուրջ ինչ–որ մոդիֆիկացիաների մասին է։ Սակայն հետաքրքիր է, որ լրացուցիչ մանրամասներ կան, ինչի մասին խոսում էր Մամեդյարովը», – ասաց Բոզոյանը։
Հենց այս հավանական «դետալներն» էլ կարող են Հայաստանում և Ադրբեջանում լուրջ քննարկման առարկա դառնալ։
Քաղաքագետը չի բացառում, որ Հայաստանում տեղի ունեցած իշխանափոխությունից հետո, համանախագահներն ուսումնասիրում են նոր ղեկավարության մոտեցումները։
«Կարծում եմ, որ հենց այս համատեքստում է պետք դիտարկել այն, ինչ առաջարկում են համանախագահները, ինչը նախկինում չի եղել, և ինչի մասին խոսում է Մամեդյարովը», – նշեց Բոզոյանը։
Նշենք, որ երկու երկրների արտգործնախարարները հերթական հանդիպումն անցկացրեցին Վաշինգտոնում հունիսի 20-ին։ Դրա արդյունքներով ԵԱՀԿ ՄԽ համանախագահները հայտարարություն տարածեցին, որում ափսոսանք հայտնեցին հակամարտության գոտում վերջին կորուստների հետ կապված և համառորեն կոչ արեցին կողմերին շտապ միջոցներ ձեռնարկել այդ ուղղությամբ, ինչպես նաև հաստատեցին հրադադարի ռեժիմի անշեղ կատարմանն ուղղված և սադրիչ քայլերից զերծ մնալու պարտավորությունները։
