ԵՐԵՎԱՆ, 24 հունիսի — Sputnik. Մոսկվայից Երևան ընթացող, հայկական «Ավազառ բուս» ուղևորափոխադրող և բեռնափոխադրող ընկերության ավտոբուսը Վերին Լարսի անցակետում է մնացել գիրոսկուտերի պատճառով։ Sputnik Արմենիայի թղթակցի հետ զրույցում այս մասին ասաց ընկերության ներկայացուցիչ Վիգենը։
Ավելի վաղ հայտնի էր դարձել, որ ավտոբուսը Մոսկվայից դուրս է եկել հունիսի 22-ին։ Ըստ Վրաստանում Հայաստանի դեսպանության տարածած տեղեկության` ավտոբուսը Վերին Լարսի անցակետի վրացական հատվածում կանգնեցվել է այսօր՝ առավոտյան ժամը 06։00-ին` արգելված բեռ տեղափոխելու համար։
«Ավտոբուսը կանգնեցվել է սահմանին գիրոսկուտերի պատճառով, որում ինչ–որ բան է հայտնաբերվել։ Այդ իրը ո՛չ ուղևորներից որևէ մեկինն է, ո՛չ էլ վարորդինը։ Մոսկվայում խնդրել են գիրոսկուտերը Երևան տանել», – ասաց Վիգենը։
Նա նշեց, որ Վրաստանի իրավապահ մարմինները պարզում են, թե ինչպես է գիրոսկուտերը հայտնվել ավտոբուսում։ Ներկա պահին ընկերությունն ուղևորների և վարորդի հետևից մեկ այլ ավտոբուս է ուղարկել, որն արդեն հասել է Վրաստան։
Վրաստանում ՀՀ դեսպանությունն ավելի վաղ հայտնել էր, որ աշխատանքներ է տանում վրացական համապատասխան մարմինների հետ՝ ավտոբուսի ուղևոր ՀՀ քաղաքացիներին Հայաստան տեղափոխելու ուղղությամբ։
Ըստ տեղեկությունների` ավտոբուսում 48 ուղևոր կա։
