ԵՐԵՎԱՆ, 24 հունիսի — Sputnik. Երևանում Ռուսաստանի Դաշնության դեսպանատան մոտ այսօր անցկացվում է ակցիա՝ ի աջակցություն իրենց հոր սպանության մեջ մեղադրվող Խաչատուրյան քույրերի։
Միխայիլ Խաչատուրյանի աղմկահարույց սպանությունը տեղի էր ունեցել Մոսկվայում 2018 թվականի հուլիսի 27-ին։ 57-ամյա տղամարդու դիակը, վզի և կրծքավանդակի բազմաթիվ կտրած–ծակած վերքերով, հայտնաբերվել էր Մոսկվայի Ալտուֆևսկի մայրուղում գտնվող տան շքամուտքում։ Երեք դուստրերը խոստովանել են, որ իրենք են սպանել իրենց հորը։ Քննության ընթացքում պարզվել է, որ Խաչատուրյանը տարիներ շարունակ բարոյական և ֆիզիկական բռնության է ենթարկել դուստրերին։ Աղջիկներին 8-10 տարվա ազատազրկում է սպառնում։
Երևանում ընթացող ակցիային մի քանի տասնյակ մարդ է մասնակցում, հիմնականում երիտասարդ կանայք։ Նրանց ձեռքում «Կանայք հրաժարվում են մեռնել», «Մենք Խաչատուրյան քույրերն ենք։ Ազատություն Խաչատուրյան քույրերին» գրությամբ պաստառներ կան։ Միևնույն ժամանակ նրանք վանկարկում են «Ազատություն»։
Ինչպես նշեց ակցիայի մասնակիցներից մեկը, ինքը եկել է, իր աջակցությունը հայտնելու աղջիկներին, որոնք շատ դժվար իրավիճակում են հայտնվել և օգնության կարիք ունեն։ Ընդ որում՝ նա խոստովանեց, որ չգիտի, թե ով է կազմակերպել ցույցը։
«Մեր հասարակության ամենամեծ դժբախտությունը անտարբերությունն է։ Մենք անտարբեր ենք միմյանց, դժվարությունների հանդեպ, և զարմանում ենք, երբ ծանր իրավիճակում հայտնվելով, ոչ ոք մեր կողքին չի լինում։ Կարևոր չէ ճանաչում ենք այդ մարդկանց, թե ոչ։ Աղջիկները շատ բարդ իրավիճակում են հայտնվել։ Նրանք հայտնվել են բռնության զոհերի կարգավիճակում։ Եվ մեզնից յուրաքանչյուրիս մասնակցությունն այս ակցիային անչափ կարևոր է», – նշեց նա։
Նրա խոսքով` գիտակից քաղաքացին պետք է հասկանա, որ լռել չի կարելի, քանի որ խոսքը մեր հայրենակիցների մասին է։
Ավելի վաղ իրենց աջակցությունը Խաչատուրյան քույրերին հայտնել էր հայտնի ռոք երաժիշտ, System of a Down խմբի հիմնադիր և հասարակական գործիչ Սերժ Թանկյանը։ Facebook սոցցանցի իր էջում նա գրել էր, որ տեղի ունեցածը ողբերգություն է, որը հերթական անգամ ապացուցում է, որ դատական համակարգը չի կարող ադեկվատ արձագանքել ընտանեկան բռնության դեպքերին։ Նրա կարծիքով դատարանը պետք է հանդուրժողականություն դրսևորի աղջիկների նկատմամբ։ Իր աջակցությունը Խաչատուրյան քույրերին հայտնել էր նաև հայտնի գրող Նարինե Աբգարյանը։
Նշենք, որ քննության վարկածի համաձայն կրտսեր դուստրը` 11–րդ դասարանի աշակերտուհին, հոր պարանոցին ու մարմնին դանակի առնվազն 35 հարված է հասցրել։ Մյուս 2 դուստրերը հոր գլխին են հարվածել։ Դրանից հետո քույրերից մեկը փոքրի ձեռքից խլել է դանակն ու հարվածել սրտին։ Սպանությունից հետո կրտսեր քույրն անձամբ է ոստիկանություն զանգահարել։
Հիշեցնենք` Մոսկվայի Օստանկինյան դատարանը 2018–ի օգոստոսի 2-ին կալանավորել էր երեք քույրերին։ Սեպտեմբերի 27-ին Մոսկվայի Բասմանյան դատարանը հավանություն է տվել Խաչատուրյան քույրերի կալանքը «որոշակի գործողությունների արգելքով» փոխարինելու միջնորդությանը։ Նրանք տեղավորվել են առանձին բնակարաններում։
