ԵՐԵՎԱՆ, 20 հունիսի — Sputnik. ՀՀ իշխանությունը շուկայականին կմոտեցնեն հողի և անշարժ գույքի կադաստրային արժեքները։ «Անշարժ գույքի հարկման նպատակով շուկայական գնահատման կարգը սահմանելու մասին» օրինագիծը հավանության արժանացավ ՀՀ կառավարության այսօրվա նիստում և ուղարկվեց ԱԺ։
Կառավարությանն առընթեր անշարժ գույքի կադաստրի պետական կոմիտեի պետ Սարհատ Պետրոսյանը հայտնեց, որ անշարժ գույքի կադաստրային արժեքները կփոփոխվեն, իսկ տարածքային գոտիները, որոնցից կախված է կադաստրային արժեքը, կվերանայվեն և՛ Երևանում, և՛ մարզերում։
Գները գրանցվում են Կադաստրի պետական կոմիտեում, դրանց հիման վրա էլ հաշվարկվում են հողի և գույքի հարկերը։ Այսուհետ նախատեսվում է յուրաքանչյուր երեք տարին մեկ վերանայել գները։
Նախարարն ընդգծեց, որ խոսքը հողի հարկի և գույքահարկի բարձրացման մասին չէ, քանի որ այդ հարցը ֆինանսների նախարարության իրավասության տակ է, և նման նախաձեռնությամբ կարող է հանդես գալ միայն ինքը։
«Մենք կվերանայենք կադաստրային արժեքները, որպեսզի դրանք ավելի շատ համապատասխանեն շուկայականին։ Իսկ այդ հիմքով հարկերը փոխելու հարցն արդեն մենք չենք որոշում։ Սակայն հանրապետությունում պետք է անշարժ գույքի օբյեկտիվ գնահատում լինի։ Այդ թվում հարկերի համար, բայց ոչ միայն։ Օրինակ` ավելի հեշտ կլինի մեկնարկային գները որոշել պետական աճուրդներում», – ավելացրեց Պետրոսյանը։
Նա ընդգծեց, որ հողի և անշարժ գույքի կադաստրային արժեքը ամենուրեք չի աճի։ Հանրության շրջանում արդեն լուրեր են պտտվում, որ ստիպված կլինեն տարեկան 700 հազար դրամի հարկ վճարել 1 քմ–ի դիմաց։
«Ուզում եմ ընդգծել` նման հարկ կլինի միայն Երևանի փոքր կենտրոնի բնակարանների համար, ընդ որում ոչ ամեն տեղ, այլ ամենաժամանակակից շենքերում, օրինակ` մոնոլիտ նորակառույց շենքերում», – ավելացրեց կադաստրի պետը։
Ֆինանսների նախարարությունը կադաստրային նոր արժեքի հիման վրա կքննարկի հողի և գույքի հարկը փոխելու հարցը։ Այսօր ֆինանսների նախարարությունը հակված է բարձրացնել գները, քանի որ Հարկային օրենսգրքի տրամաբանությունը հետևյալն է` հարկերը նվազեցնել արտադրության և բարձրացնել սպառման համար (հատկապես թանկարժեք գույքի և ոչ առաջնային անհրաժեշտության ապրանքների)։
Երևանի գլխավոր հրապարակի մոտ գտնվող հսկա փոսը դատարկ է. հարկերը վճարում են, փոսը չի լցվում
Այդ պատճառով թանկարժեք անշարժ գույքի հարկերի բարձրացման հնարավորությունը մանրամասն կքննարկվի, որից հետո աշնանը կներկայացվի ԱԺ։ Ենթադրվում է, որ օրինագիծը պետք է ընդունվի մինչև 2019 թվականի ավարտը, որպեսզի փոփոխություններն ուժի մեջ մտնեն արդեն 2020 թվականից Հարկային օրենսգրքի մյուս փոփոխությունների հետ մեկտեղ։
