ԵՐԵՎԱՆ, 19 հունիսի — Sputnik. «Բարգավաճ Հայաստան» կուսակցության առաջնորդ Գագիկ Ծառուկյանը երկրորդ անգամ հրաժարվել է հարցաքննության ներկայանալ քննչական կոմիտե։ Այսօր լրագրողների հետ զրույցում Ծառուկյանը հայտարարել է, որ արդեն բացատրել է իր գործողությունների պատճառները, և հարցն իր համար փակ է։
Երեկ նա հայտնել էր, որ իր փաստաբանի միջոցով գրավոր պատասխան է ուղարկել քննչական կոմիտե։ Ծառուկյանը մի քանի օր առաջ ստացել էր առաջին ծանուցումը, բայց հետո հայտնի էր դարձել, որ պատռել է այն։ ՔԿ–ն ևս մի ծանուցում էր ուղարկել։
ԲՀԿ առաջնորդին հարցաքննության են հրավիրում Աբովյան քաղաքում «Քաղաքացիական պայմանագիր» կուսակցության թեկնածուի ենթաշտաբներից մեկի պետի մեքենան հրկիզելու փաստի առթիվ հարուցված քրեական գործի նախաքննության շրջանակում: Քննչական կոմիտեի Կոտայքի մարզային քննչական վարչության Աբովյանի քննչական բաժնում քննություն է տարվում` պարզելու ուրիշի գույքը դիտավորյալ ոչնչացնելու կամ վնասելու դեպքի հանգամանքները:
«Ես հարգում եմ օրենքը, բոլորը հավասար են դրա առաջ։ Իմ օբյեկտներն առավոտից գիշեր ստուգում են։ Եթե անհրաժեշտություն լիներ (ներկայանալ հարցաքննության), ապա հիմա իմ հետևից հազար հոգի կուղարկեին։ Սա շոու է, ի՞նչ եք կպել ինձնից։ Եթե գործը չբացահայտեն, նշանակում է, որ դա սարքած էր։ Ուզում էին ստվեր գցել ընտրությունների վրա», – լրագրողներին ասաց վրդովված Ծառուկյանը։
Քննչական կոմիտեն առայժմ չի մեկնաբանում Ծառուկյանի գործողությունները։ Ընթացակարգի համաձայն` ՔԿ–ն կարող է դիմել էթիկայի խորհրդարանական հանձնաժողով, որպեսզի այն գնահատական տա պատգամավորի գործողություններին։ Կոմիտեից ավելի վաղ ասել էին, որ եթե անհրաժեշտություն ծագի, ապա Ծառուկյանին բռնի ուժով կտանեն հարցաքննության։
