Նախորդ տարիների համեմատ կտրուկ աճել է զրպարտության և վիրավորանքի համար ԶԼՄ-ների դեմ ներկայացված հայցադիմումների թիվը։ Ինֆորմացիայի ազատության կենտրոնի հիմնադիր նախագահ Շուշան Դոյդոյանը Sputnik Արմենիայի հետ զրույցում խոսել է այն մասին, թե ինչու է այս վիճակագրությունն անհանգստացնող համարել և անդրադարձել հայցադիմումների թվի աճի պատճառներին։
«91 հայցադիմում ստացվել է միայն 2018թ. մայիսից մինչ 2019թ. հունիս ընկած ժամանակահատվածում․ շատ հաճախ դատական գործերը տևում են 2 տարի և կարող են ձգձգվել մինչև 5 տարի, այսինքն՝ այս նորերը եկել են լրացնելու արդեն եղածներին, որոնք դեռ ընթացքի մեջ են։ Բավական վստահելի, լավ լրատվամիջոցներ կան, որոնք են կարող են միաժամանակ ընթացքի մեջ, օրինակ, 5-6 գործ ունենալ»,- ասում է Դոյդոյանը՝ նշելով, որ այս դեպքում ԶԼՄ-ն չի կարող լիարժեք կատարել իր հիմնական առաքելությունը՝ տեղեկատվություն փոխանցել հանրությանը, որովհետև ժամանակի մի զգալի հատված պիտի օգտագործեն դատական գործերին պատրաստվելու համար։
Ըստ Դոյդոյանի՝ երկրորդ անհանգստացնող հանգամանքն այն է, որ հայցապահանջների մեծ մասում առկա է նաև ֆինանսական փոխհատուցման պահանջ՝ զրպարտության դեպքում այն կարող է լինել մինչև 2 միլիոն ՀՀ դրամ, վիրավորանքի դեպքում՝ մինչև 1 միլիոն ՀՀ դրամ։
«Եթե դրանք բավարարվում են դատարանների կողմից, ապա լուրջ ֆինանսական բեռ կարող է դառնալ առանց այն էլ ֆինանսապես ոչ լավ վիճակում գտնվող ԶԼՄ-ների համար, և դրանք նույնիսկ կարող են կանգնել փակման վտանգի առաջ»,- ասում է Դոյդոյանը։
Նրա խոսքով՝ հայցադիմումների հեղինակների մեծ մասը քաղաքական գործիչներ են, պետական պաշտոնյաներ, որոնք պետք է ավելի հանդուրժող լինեն իրենց հասցեին արված քննադատության, նաև վիրավորանքի դեպքերում, և այս մասին խոսվում է նաև միջազգային տարբեր կառույցների ընդունած որոշումներում, կոնվենցիաներում։
