ԵՐԵՎԱՆ, 17 հունիսի — Sputnik. Հունիսի 15-ին՝ ժամը 11:45-ի սահմաններում, դեռևս չպարզված հանգամանքներում, հրազենային վիրավորում ստացած ժամկետային զինծառայող, 2000թ. ծնված Համլետ Գալստյանի դեպքի առնչությամբ ձերբակալվել է նրա ծառայակիցը: Sputnik Արմենիային այս մասին հայտնեց ՀՀ Քննչական կոմիտեի տեղեկատվության և հասարակայնության հետ կապերի բաժնի պետ Նաիրա Հարությունյանը։
Ինչպես արդեն հայտնել էինք, դեպքը տեղի էր ունեցել Արցախում։ Ըստ տեղեկությունների` Ասկերանի պահպանության տեղամասում զինվորների միջև վիճաբանություն է եղել, ու հետո կրակոցներ են հնչել։
«Գալստյանի՝ ձախ աչքի շրջանի հրազենային վնասվածք ստանալու դեպքի առթիվ առաջին կայազորային քննչական բաժնում ՀՀ քրեական օրենսգրքի 34-104-րդ հոդվածի 1-ին մասով (կյանքի և առողջության դեմ ուղղված հանցագործություններ) նախատեսված հանցագործության հատկանիշներով հարուցվել է քրեական գործ։ Կատարվում է նախաքննություն»,–հայտնեց Հարությունյանը։
Համլետ Գալստյանը քրեական գործով ճանաչվել է տուժող:
Քրեական գործով նախաքննությունը շարունակվում է, ձեռնարկվում են անհրաժեշտ քննչական և դատավարական գործողություններ՝ դեպքի բազմակողմանի, լրիվ և օբյեկտիվ հետազոտումն ապահովելու ուղղությամբ:
Հիշեցնենք, որ ըստ Shamshyan.com–ի` զինծառայողի վրա կրակոցներ արձակողը Հայաստանում հայտնի գործարարներից մեկի բարեկամն է։
