ԵՐԵՎԱՆ, 17 հունիսի — Sputnik. Երևանի քաղաքապետարանը մտադիր է գործարկել վերելակների առկա ֆոնդի փոխարինման և բարելավման պիլոտային ծրագրի առաջին փուլը: Այս մասին հայտնում է քաղաքապետարանի մամուլի ծառայությունը։
«Երևանի վերելակների առկա ֆոնդի փոխարինման և բարելավման ծրագիրն այսօրվանից կմտնի գործնական կիրառման փուլ: Աշխատանքային հերթական խորհրդակցության ժամանակ քաղաքապետ Հայկ Մարությանին զեկուցվել է, որ ծրագիրը կյանքի կոչելու համար կհայտարարվի մրցույթ: Համաձայն ծրագրի` առաջին պիլոտային փուլում մայրաքաղաքում նախատեսվում է փոխարինել 20 վերելակ», – նշված է հաղորդագրության մեջ։
Ավելի վաղ փոխքաղաքապետ Հայկ Սարգսյանը հայտնել էր, որ քաղաքապետարանը մտադիր է փոխարինել մայրաքաղաքի բազմահարկ շենքերի բոլոր վերելակները, բայց դրա համար ստիպված կլինեն վճարել բնակիչները։ Նրա խոսքով` քաղաքապետարանի բյուջեն 31 մլրդ դրամ է։ Քաղաքում մինչև 3600 վերելակ փոխելու անհրաժեշտություն կա, ինչը մոտ 30 միլիարդ դրամի ծախս է ենթադրում։ Հասկանալի է, որ եթե աշխատանքներն իրականացվեն միայն քաղաքապետարանի հաշվին, ապա մյուս ծրագրերի համար միջոցներ չեն մնա:
Երևանի բնակիչները նոր վերելակների գումարը կվճարեն 25 տարվա ընթացքում։ 2–3 տարվա երաշխիք ունեցող ժամանակակից վերելակը մեկ մուտքի բնակիչների համար 10 միլիոն դրամ կարժենա։
Վերելակները կսկսեն փոխել բոլոր բնակիչների համաձայնությունը ստանալուց հետո։ Մեկ վերելակը փոխելու համար միջինը 35-40 օր է պետք։ Երևանի բոլոր 3600 վերելակները փոխելու համար 3,5-4 տարի կպահանջվի, եթե միաժամանակ աշխատեն 80 բրիգադ և 1100 վերելակ փոխեն մեկ տարվա ընթացքում։
Վերելակների շահագործման միջին ժամկետը 25 տարի է։ 2012-2018 թվականներին վերելակների վթարների հետևանքով Երևանում մահացել են 6 մարդ, ևս 5–ը` վնասվածքներ ստացել։
Հիշեցնենք` երևանյան շենքերում ընդհանուր առմամբ 4642 վերելակ կա։ Դրանցից ավելի քան 60–ը բացասական եզրակացություն են ստացել 2018 թվականի հունվարի 1–ից մինչև դեկտեմբերի 24–ն անցկացված տեսչական ստուգումների արդյունքում։
