ԵՐԵՎԱՆ, 17 հունիսի — Sputnik. Ռոբերտ Քոչարյանի հետ ունեցած հանդիպման առնչությամբ ՌԴ դեսպան Սերգեյ Կոպիրկինն անցած ուրբաթ հրավիրվել է ԱԳՆ: Այս մասին Facebook սոցիալական կայքի իր էջում գրել է ԱԺ Արտաքին հարաբերությունների հանձնաժողովի նախագահ Ռուբեն Ռուբինյանը:
Ինչպես արդեն հայտնել էինք, հունիսի 13–ին Հայաստանում ՌԴ արտակարգ և լիազոր դեսպան Սերգեյ Կոպիրկինն այցելել էր Ռոբերտ Քոչարյանին։
«Այսօր ԱԺ Արտաքին հարաբերությունների հանձնաժողովի նիստից հետո, որի շրջանակներում քննարկվել էր նաև ՌԴ դեսպանի և Ռոբերտ Քոչարյանի միջև տեղի ունեցած հանդիպումը, խոսել եմ արտաքին գործերի նախարար Զոհրաբ Մնացականյանի հետ։ Նախարարն ինձ տեղեկացրեց, որ իրականում ՌԴ դեսպանն այս առնչությամբ անցած ուրբաթ հրավիրվել է ԱԳՆ»,–գրել է Ռուբինյանը։
Նրա խոսքով` դեսպանի հետ տեղի է ունեցել զրույց՝ ՀՀ ներքին գործերին չմիջամտելու համատեքստում։
Նշենք, որ այսօր ԱԺ–ում այս մասին ասաց ՀՀ արտաքին գործերի փոխնախարար Գրիգոր Հովհաննիսյանը հայտնել էր, որ դիվանագիտական արարողակարգով ԱԳՆ–ն որևէ կտրուկ առարկություն կամ հայտարարություն չի կարող անել և չունի։
Անդրադառնալով այս հայտարարությանը` Ռուբինյանը նշել է, որ Հովհաննիսյանը նման կարծիք է հայտնել, քանի որ այդ պահին չուներ տեղեկությունը հրապարակայնացնելու թույլտվություն։
Հիշեցնենք, որ Հովհաննիսյանը հայտնել էր նաև, որ ՌԴ դեսպանի քայլը չի կարող դատապարտելի կամ հատուկ քննության առարկա դառնալ ԱԳՆ–ի կողմից։
Կոպիրկինի և Քոչարյանի հանդիպումը կայացել է ՀՀ երկրորդ նախագահի գրասենյակում, որը գտնվում է «Էրեբունի Պլազա» բիզնես կենտրոնում։
