ԵՐԵՎԱՆ, 17 հունիսի — Sputnik. Հայաստանում ՌԴ դեսպան Սերգեյ Կոպիրկինը, այցելելով ՀՀ երկրորդ նախագահ Ռոբերտ Քոչարյանին, դիվանագիտական արարողակարգի նորմերի շրջանակներում որևէ սխալ արարք չի գործել։ Այսօր ԱԺ–ում այս մասին ասաց ՀՀ արտաքին գործերի փոխնախարար Գրիգոր Հովհաննիսյանը` պատասխանելով ԱԺ «Լուսավոր Հայաստան» խմբակցության պատգամավոր Արման Բաբաջանյանի հարցին, թե ինչո՞ւ դեսպանը չի կանչվել ԱԳՆ` պարզաբանման համար։
Ինչպես արդեն հայտնել էինք, հունիսի 13–ին Հայաստանում ՌԴ արտակարգ և լիազոր դեսպան Սերգեյ Կոպիրկինն այցելել էր Ռոբերտ Քոչարյանին։
«Դեսպանի քայլը չի կարող դատապարտելի կամ հատուկ քննության առարկա դառնալ մեր գերատեսչության կողմից։ Անշուշտ, հանրային, պետական գործիչների կարծիքները բոլորս էլ լսեցինք ու տարբեր արձագանքներ տեսանք։ Սակայն, ինչ վերաբերում է ԱԳՆ–ի արձագանքին, ապա դիվանագիտական արարողակարգով մենք որևէ կտրուկ առարկություն կամ հայտարարություն չենք կարող անել և չունենք»,–ասաց Հովհաննիսյանը։
ԱԺ–ում, ի դեպ, արտաքին հարաբերությունների մշտական հանձնաժողովի հերթական նիստն է ընթանում։
Արարատ Միրզոյանն անդրադարձել է Ռոբերտ Քոչարյանի և ՌԴ դեսպանի հանդիպմանը
Հիշեցնենք, որ Կոպիրկինի և Քոչարյանի հանդիպումը կայացել է ՀՀ երկրորդ նախագահի գրասենյակում, որը գտնվում է «Էրեբունի Պլազա» բիզնես կենտրոնում։
