ԵՐԵՎԱՆ, 13 հունիսի — Sputnik. Եթե երկու կողմ պայմանավորվում են իրար վրա չկրակել, ու հակառակորդը խախտում է այդ խոստումը, մյուս կողմն այդ դեպքում ի՞նչ պետք է անի։ Ազգային ժողովում լրագրողների հետ զրույցում նման հարցադրմամբ հանդես եկավ ՀՀ ՊՆ մամուլի խոսնակ Արծրուն Հովհաննիսյանը։
«Հայկական կողմն ի՞նչ է` հավատարմության երդումը մշտական պահողի կոչո՞ւմ ունի, իսկ ադրբեջանական կողմը` պայմանավորվածությունը մշտական խախտողի՞։ Նման իրավունք ոչ ոք ոչ մեկին չի տվել»,–ասաց նա։
Հիշեցնենք, որ օրերս Հովհաննիսյանը Facebook–ի իր էջում գրառում էր կատարել` նշելով, որ պաշտպանության նախարար Դավիթ Տոնոյանը բարձր պարգևատրման է ներկայացրել հակառակորդի կրակոցներից հունիսի 1–ին զոհված զինծառայող Սիփան Մելքոնյանի մահվան համար «պատժիչ գործողություն իրականացրած զինծառայողներին, որոնք բարձր որակով են կատարել առաջադրանքը»։
